Հարցին՝ իսկ ինչո՞ւ Հանրապետականը տասը տարվա ընթացքում այդ տարբերակով չպայքարեց կոռուպցիայի դեմ, նա պատասխանեց. «Մեր իշխանության ժամանակ յուրաքանչյուր տարի այդ պայքարը բարելավվել է։ Մեր խնդիրը երևի այն է եղել, որ մենք դրան դանդաղ էինք գնում և պոպուլիստական հայտարարություններ չէինք անում, կամ էլ՝ մարդկանց ցուցադրական բռնում, փողը վերցնում ու բաց թողնում»։
Սա հատված էր պաշտպանության նախկին փոխնախարար, ՀՀԿ-ական Արտակ Զաքարյանի հարցազրույցից` տրված 168.am կայքին:
«ՉԻ». Այս իրավիճակը բնորոշելու համար մեր ռազմավարական դաշնակիցներն ունեն տիպիկ խոսք՝ наглость второе счастье: Նախկին կառավարության կեսի նկատմամբ հարուցվել են քրեական գործեր, մի քանիսը կալանավորված են ներկայիս դատական համակարգի պայմաններում, իսկ դա նշանակում է, որ մեղսագրվող արարքները բավականին հիմնավոր և ծանր են, մի մասը դիմել է փախուստի, իսկ հանրապետականը ասում է, որ իրենք տարեցտարի ավելի լավ են պայքարել կոռուպցիայի դեմ:
Ամենայն հավանականությամբ պայքարելով է Սաշիկ Սարգսյանը բանկերից միայն մեկում ավանդադրել 30 միլիոն դոլար և հիմա խելոք, առանց բողոքարկելու նվիրեց պետությանը: Կոռուպցիայի դեմ պայքարի արդյունքում է Սերժ Սարգսյանի մյուս եղբոր ընտանիքն ապօրինի կուտակել միլիոնավոր դոլարներ, իսկ ներկայումս փախած են, քանի որ չեն կարողանում բացատրել դրանց ծագումնաբանությունը: Կոռուպցիայի դեմ տարեցտարի ավելի արդյունավետ պայքարի արդյունքում է Միքայել Մինասյանի հայրը՝ Արա Մինասյանը, ամեն տարի ավելացրել բյուջեից անվճար բուժման համար հատկացվող գումարների յուրացումը:
Միայն մեկ հարցում կարելի է մասամբ համաձայնվել Արտակ Զաքարյանի հետ: Չպետք է թալանված փողը վերադարձնելու դեպքում կարճել քրեական գործերը: Պետք է ամեն ինչ անել, որ նրանց մոտ մնացած ֆինանսական միջոցները ծախսվեն միմիայն փաստաբանների վրա և ոչ մեդիաների: