ԱԱԾ նախկին տնօրեն Արթուր Վանեցյանը թվիթերյան իր միկրոբլոգում գրում է.
«Կարծում եմ՝ երեկվա ասուլիսից ու այսօրվա գրիչի պատմությունից հետո իշխող կուսակցությունը, ազգային անվտանգության նկատառումներից ելնելով, պետք է քննարկի իր շարքերից վարչապետի նոր թեկնածու առաջադրելու հարցը»:
«ՉԻ». Միայն այս գնահատականը կարող է փաստել՝ Վանեցյանը ոչ միայն ձախողեց ԱԱԾ աշխատանքը, այլ նաև ձախողելու է քաղաքական գործունեությունը:
Պետության ղեկավարներին գաղտնալսել թույլ տալը ազգային անվտանգությանը սպառնալիք չէր: Տասնյակներով հանցագործներին «կորցնելը» և նրանց թույլ տալը հանրապետությունը լքել ազգային անվտանգությանը սպառնալիք չէր: Օտար պետությունների հատուկ ծառայությունների շահերը սպասարկելը ազգային անվտանգությանը սպառնալիք չէր: Նախկին հանցագործ ռեժիմի ներկայացուցիչների հետ սիլի-բիլի անելը ազգային անվտանգությանը սպառնալիք չէր: Բայց ահա գրիչը սպառնալիք է:
Այս հապճեպ հայտարարությունը գալիս է փաստելու՝ ինչպես պատահմամբ հայտնվել է ԱԱԾ համակարգում, նույն տրամաբանությամբ էլ փորձում է տեղավորվել քաղաքական դաշտում: Վարչապետին փոխելու արմատական կոչեր չեն անում անգամ քոչարյանականները՝ հասկանալով, որ իրենց համար նպաստավոր պահը դեռ չի հասունացել:
Տարրական վերլուծության արդյունքում Վանեցյանը պետք է հասկանար, որ իր այդ խոսքերով հաստատում է մեղադրանքը՝ ցանկացել է պետական հեղաշրջում կատարել, բայց ձախողել է:
Տարին նոր է սկսվել, բայց Վանեցյանն արդեն հավակնում է տարվա քաղաքական ֆալստարտի առաջին մրցանակին: