ԱԺ «Իմ քայլը» խմբակցության պատգամավոր Վիլեն Գաբրիելյանը գրել է. «Վալերիանկան գիտեմ հաստատ ձեռքներդ ա, որպես նախկին դիպլոմով դեղագետ հորդորում եմ՝ բոյարիշնիկ գումարած պուստիրնիկ հետը խառնեք, ձև չկա պիտի ասեմ՝ Հոլի գաղափարը չգիտեմ ով է մտածել, բայց Երկնային, Հզորագույն Գեղեցիկ և Հայկական գաղափար էր»:
«ՉԻ». Օրերս աչքներովս մի ֆեյսբուքյան գրառում ընկավ: Մեկը գրել էր. եթե այս իշխանությունները հանկարծ ինչ-որ հարցում հաջողության հասնեն, բոլորիս բռնաբարելու են:
Սրա մեջ ճշմարտության հատիկ կա. մի հատ կրպակ էին Հրապարակից հանել, քիչ էր մնում ազգային տոն հռչակեին այդ օրը: Հիմա իմքայլական պատգամավորը մի այնպիսի պաթոսով է ստատուս գրել, կողքից կմտածեն, թե Լաչինի միջանցքը ազատ ու անվտանգ են դարձրել, ադրբեջանցիներին են այնտեղից քշել:
Չէ, խոսքն ընդամենը «Մանկական Եվրատեսիլում» լուսաձայնային էֆեկտների մասին է: Էֆեկտներ, որոնք պետք է ուրախացնեն 5 տարեկան երեխային, այլ ոչ թե իշխանական պատգամավորին: Եթե, իհարկե, իշխանական պատգամավորը 5 տարեկան երեխայի ուղեղով չի:
Թուր ու թվանք են կտրել այդ էֆեկտներից, քաջերից քաջ դարձել: Իսկ այդ ընթացքում Արցախը կորցնելու վտանգի առջև ենք կանգնել: