Հայաստանը հոդված չի պատվիրել: «ՉԻ»-ի հետ զրույցում որոշ լրատվամիջոցներում վարչապետ Նիկոլ Փաշինյանի կողմից աշխարհի ամենահեղինակավոր ամսագրերից մեկում՝ «Time»-ում, հոդված պատվիրելու մեկնաբանությունների առնչությամբ պարզաբանեց վարչապետի մամուլի խոսնակ Վլադիմիր Կարապետյանը:
«Այդպիսի բան չկա: Ոչ: Կառավարությունը, պետական որևէ կառույց առնչություն չի ունեցել»,- ասաց վարչապետի մամուլի խոսնակը:
Հիշեցնենք, որ աշխարհի ամենահեղինակավոր ամսագրերից մեկը՝ «Time»-ը, Հայաստանը կոչել էր «Կովկասյան վագր»: Վարչապետ Նիկոլ Փաշինյանն իր ֆեյսբուքի էջում տեղեկացրել էր, որ «Time» պարբերականը, տպավորված 2019-ին Հայաստանի ցույց տված տնտեսական արդյունքներով, իր տարեվերջյան համարում Հայաստանը անվանել է «Կովկասյան վագր»:
«Ուշադրություն դարձրեք, ոչ թե մենք ենք անվանում, այլ «Time»-ը»,- գրել է վարչապետը:
Փաշինյանի գրառումին հաջորդեցին որոշ լրատվամիջոցների վերլուծականներն ու «հետաքննությունները», իբրև Փաշինյանը «Time»-ում նյութ է պատվիրել և գովազդով տեղադրված նյութը ներկայացնում է որպես ձեռքբերում՝ հերթական անգամ մանիպուլյացիայի ենթարկելով հասարակությանը: