Լրատվամիջոցների տեղեկությունների համաձայն՝ Ջերմուկում Նիկոլ Փաշինյանի և տարբեր երկրներում ՀՀ դեսպանների հանդիպման ժամանակ հետաքրքիր միջադեպ է տեղի ունեցել։ Ուկրաինայում ՀՀ դեսպան Վլադիմիր Կարապետյանը Նիկոլ Փաշինյանին հորդորել է աջակցություն հայտնել Ուկրաինային, որովհետև պատերազմում այդ երկրի հաղթանակն ամիսների հարց է, Ռուսաստանում ՀՀ դեսպան Վաղարշակ Հարությունյանն էլ նրան «հիվանդ» է անվանել՝ հայտարարելով, թե Ռուսաստանը ոչ մի դեպքում չի պարտվի։
Ակնհայտ է, որ իրականում «հիվանդը» Հայաստանի արտաքին քաղաքականությունն է ու դրա թիվ մեկ պատասխանատուն։ Որովհետև եթե երկիրը սեփական արտաքին քաղաքականություն չունի՝ դեսպանները ստիպված են պաշտպանել այն երկրների շահերը, որտեղ ապրում և աշխատում են։ Մինչդեռ «գլխավոր հիվանդն», ասում են, լուռ հետևել է դեսպանների լեզվակռվին ու վերջում «տեղեկացրել», որ երկիր Նաիրի այլևս գոյություն չունի։ Որից հետո երևի այդ առթիվ միմյանց շնորհավորել են «Նաիրի» կոնյակով ու բարիշել։