Երևանի Օպերայի և Բալետի թատրոնում՝ Արամ Խաչատրյանի համերգասրահում, մարտի 18-ին տեղի կունենա... ռուսական «Բուտիրկա» խմբի համերգը:
«ՉԻ». Շատ ու շատ տարիներ առաջ, Օպերայի շենքում, եթե չենք սխալվում, Գագիկ Ծառուկյանի նախաձեռնությամբ սամբոյի ինչ-որ առաջնություն էր կազմակերպվել:
Շատ մեծ աղմուկ բարձրացավ: Ո՞նց թե մեր մշակույթի գլխավոր օրրանում, մեր ազգային հպարտություն հանդիսացող վայրում ինչ-որ սամբիստներ մրցեն: Բա որ կարդաք, թե Գագիկ Ծառուկյանին ինչ քննադատության էր ենթարկում այն լրատվամիջոցը, որի լրագրողները հիմա բարձրաստիճան պաշտոնյաներ են:
Հիմա մեր Օպերա, որտեղ Գոհար Գասպարյանն ու Լուսինե Զաքարյանն են երգել, «Սպարտակն» ու «Տրավիատան» են բեմադրվել, գողական, ավելի ճիշտ «բլատնոյ» խումբ են բերում: Ու մարդիկ Արամ Խաչատրյանի, Ալ. Սպենդիարյանի, Գրիգոր Խանջյանի պատկերների ներքո պիտի «Вот такая доля воровская» ունկնդրեն: Ունկնդրեն-ը մի քիչ չափազանցված է:
Պատկերացնում ենք, թե ինչ մասսա է հավաքվելու այդ օրը: «Ինտերպոլը» որ ուշադիր լինի, ահագին բացահայտումներ կանի: