ԱԺ ՔՊ խմբակցության պատգամավոր Հակոբ Ասլանյանը՝ խորհրդարանական քննարկումների ժամանակ անդրադառնալով այդ խնդրին, որ Հայաստանից հեռանում են հայտնի մարզիկներ, մասնավորապես՝ Լևոն Արոնյանն ու Հենրիխ Մխիթարյանը, ասել է. «Հիմա խոսքը վերաբերում է երկու անձնավորության, որոնք չեն եղել հայրենասիրության այն աստիճանի, որ թողել են հայրենիքից գնացել են և դա դրոշակ դարձնել, թե՝ տեսեք, ձեր պատճառով գնաց, առնվազն….չգիտեմ՝ ծիծաղելի՞ է, թե՞ անմտություն: Ինչքան շատ գնան այդպիսի մարդիկ, այնքան շուտ կմաքրվի այս երկիրը»:
«ՉԻ». ***** ***** ****: Էս մասը ստիպված ենք թաքցնել, որ քրօրի տակ չընկնենք: Դե, դժվար է սառնասիրտ մնալ, երբ երկրիդ պատգամավորը գոհունակություն է հայտնում, որ վերջին 30 տարվա մեր լավագույն շախմատիստն ու ֆուտբոլիստը լքում են հայրենիքը: Փաստորեն, Մխիթարյանն ու Արոնյանն էին մեր երկրի կեղտը, որոնց հեռանալով օդը կմաքրվի:
Սրանք մոռացել են, որ իրենց գործունեության արդյունքում ոչ միայն Արոնյանն ու Մխիթարյանը, այլ նաև տասնյակ հազարավոր այլ քաղաքացիներ են հեռացել հայրենիքից: Ընդ որում՝ ստիպված, քանի որ զրկվել են Արցախում իրենց տներից:
Ինչու են մեր տիտղոսակիր մարզիկները հեռացել երկրից՝ առանձին հարց է, գուցե ընդդիմությունն իսկապես շահարկում է դա, բայց որ իշխող կուսակցության ներկայացուցչին դա ոչ միայն ցավ չի պատճառում, դեռ մի բան էլ անվանարկում է գնացողներին, *** ****** ****: Հաստատ: Ու ինչքան երկար մնան այսպիսի պատգամավորները, այնքան շուտ մեր երկիրը կվերանա: