«- Ձեր կարծիքով, ճիշտը դաշինքո՞վ, թե՞ միայնակ մասնակցությունն է, ասում են՝ որևէ դեպքում չպետք է փոշիացնել ընդդիմության ձայները և պետք է մեծ դաշինքով մասնակցել՝ ընդդեմ իշխանության։
- Եթե իմ տեսակետն եք ուզում իմանալ՝ սրա հետ ընտրությունների գնալն անլրջություն է»։
Սա հատված էր ՀՀԿ-ական Վահրամ Բաղդասարյանի՝ «Հրապարակ» թերթին տված հարցազրույցից:
«ՉԻ». Կարելի է միայն պատկերացնել, թե ինչ կպատահեր Վահրամ Բաղդասարյանի հետ, եթե նա տարիներ առաջ Ռոբերտ Քոչարյանի որևէ քայլ անլրջություն որակեր: Հայրենի Վանաձորում այնքան կծեծեին, որ Շարմազանովին քեռի կանվաներ: Քոչարյանը հայտարարել է, որ գնում է կրելու, իսկ Բաղդասարյանը այդ քայլը անվանում է անլրջություն:
Բայց համաձայնեք, որ Բաղդասարյանը միայնակ այնքան համարձակություն չունի, որ Քոչարյանին անլուրջ անվանի: Ուրեմն այդպես է մտածում Սերժ Սարգսյանը և Բաղդասարյանի շուրթերով տեղեկացնում, թե ինչ է կարծում Քոչարյանի արշավի մասին:
Առաջիկա ընտրությունների գլխավոր ինտրիգներից է դառնալու նաև այն, թե Սերժ Սարգսյանը և ՀՀԿ-ն, չմասնակցելով ընտրություններին, ծառայեցնելո՞ւ են արդյոք իրենց ստվերային ռեսուրսները հօգուտ Քոչարյանի, թե՞ թողնելու են, որ բավարարվի Վահե Հակոբյանի ու նմանատիպ կերպարների ռեսուրսներով: Եթե չօգնեն, առավելագույնը 5 տոկոս կկրի: Բաղդասարյանի խոսքից երևում է, որ հակված չեն օգնելու: