ՀՀ Պաշտպանության նախկին փոխնախարար, ԱԺ ՀՀԿ խմբակցության նախկին պատգամավոր Արտակ Զաքարյանն իր ֆեյսբուքյան էջում գրել է.
«Չորս տարի շարունակ մեր երկրում անընդհատ աղավաղվում է մի շատ կարևոր գործընթաց, որը ոչ թե Սերժ Սարգսյանի համար է կարևոր, այլ մեր երկրի համար է կարևոր։ Այդ մասին ֆեյսբուքյան գրառում է արել:
Մեր երկրից, մեր ժողովրդից, մեր պետությունից ցանկանում են գողանալ շատ կարևոր հաղթանակ։ Եվ գողանում են նրանք, ովքեր կասկածի տակ են դնում Ապրիլյան պատերազմում մեր բանակի ու ժողովրդի հաղթանակը:
Հաղթանակ` որը քաղաքական, ռազմական ու դիվանագիտական մեծ հնարավորություններ է տվել Արցախյան բանակցային գործընթացին»:
«ՉԻ». Որքան հասկացանք, 2016-ի ապրիլին երկու հայ-ադրբեջանական պատերազմ է եղել: Մի պատերազմում մեր բանակը փայլուն հաղթանակ է տարել, Հայաստանն ու Արցախը քաղաքական, ռազմական ու դիվանագիտական լուրջ խաղաքարտեր են ստացել բանակցային գործընթացում: Բնականաբար, այս պատերազմում հաղթել ենք Սերժ Սարգսյանի շնորհիվ:
Երկրորդ պատերազմում մենք ունեցել ենք տարածքային կորուստներ, այդ թվում՝ մի շարք կարևոր և ռազմավարական նշանակություն ունեցող բարձունքներ, ինչը խոստովանել էր Սերժ Սարգսյանը, 100-ից ավելի զոհ ենք տվել, մեր հետախուզությունը չի կարողացել կատարել իր առջև դրած խնդիրները և կանխատեսել Ադրբեջանի հարձակումը, արդիական զենքի և սպառազինության խնդիր ունեինք, ինչը խոստովանել էր Սերժ Սարգսյանը, սահմանային շատ հենակետեր բավարար կերպով ամրացված չէին, չունեին անհրաժեշտ հետախուզական սարքավորումներ, գիշերային տեսողության սարքեր: Այս կորուստների և բացթողումների հետ Սերժ Սարգսյանը որևէ կապ չի ունեցել: Ամեն ինչ ինքն իրեն է ստացվել:
Բայց լավ են սովորել: Տեր-Պետրոսյանի օրոք ռազմական փայլուն հաջողություններ և ձեռքբերումներ ենք ունեցել, սրանք ասում էին և ասում են՝ Լևոնը հողերը ծախում էր, 2016-ին տարածքային կորուստներ ենք ունեցել, ասում են՝ ռազմական հաղթանակ ենք տարել:
Իրենք աղավաղել, նսեմացրել և գողացել են 1990-ականների պատերազմի հաղթանակները, իսկ հիմա մուննաթ են գալիս, թե իրենց անհաջողություններին անհաջողություն են անվանում:
Հ.Գ. Ուշադրություն դարձրեք, մենք ոչ մի տեղ չենք նշել, որ Ապրիլյան պատերազմում պարտություն ենք կրել: Ոչ մի տեղ չենք նշել, որ Սերժը հողեր է տվել: Մենք ընդամենը իրերն իրենց անուններով ենք ներկայացրել: Ունեցել ենք և կորուստներ, և հաջողություններ, այդ պատերազմում նաև հերոսական փայլուն էջեր են գրվել: