Մի շարք լրատվամիջոցներ հրապարակել էին Ռոբերտ Քոչարյանի որդու՝ Լևոն Քոչարյանի լուսանկարը, որտեղ նա զինվորական համազգեստով է և գրել էին, որ վերջինս այս պահին գտնվում է առաջնագծում:
Սոցցանցերի օգտատերերը ստուգել էին այդ լուրը և պարզել, որ լուսանկարն արվել է 2013 թվականին:
«ՉԻ». Մի շարք օգտատերեր նույնիսկ կոնկրետ նշեցին, որ 2013 թվականին Լևոն Քոչարյանը գնացել է Խոսրովի անտառ՝ որսի և այնտեղ է լուսանկարվել:
Հիմա բնականաբար հարց է առաջանում. ինչո՞վ են մտածել, որ այսպիսի քայլի են գնացել ձեզ, մեզ, բոլորիս հայտնի լրատվամիջոցները: Մենք չգիտենք, թե ներկայումս որտեղ է գտնվում Լևոն Քոչարյանը: Կարող է՝ առաջնագծում է, կարող է՝ տանն է, դժվա՞ր է դա ստուգել:
Զոռով կարծես ամեն ինչ անեն հանրությանը հունից հանելու համար: Բազմաթիվ հրաշալի տղաներ են այս պատերազմում զոհվել, որոնք գոնե մի լուսանկար չունեն մարտադաշտից, նրանց ծնողների վիճակը պատկերացնո՞ւմ եք, երբ այսպիսի պիղծ երևույթներ են տեսնում:
Ու ամեն օր այս վիճակն է: Ոչ մի պատասխանատվություն, ոչ մի կարմիր գիծ: Որ մի բան էլ ասում ես՝ մուննաթ են գալիս: Սրանց համար պատերազմ հասկացություն չկա:
«Չորրորդ իշխանություն», թիվ 34, 2020