ՀՀ Ազգային Ժողովը ընդունել է «Բնակչության բժշկական օգնության և սպասարկման մասին» օրենքում լրացումներ կատարելու մասին՝ կառավարության ներկայացրած նախագիծը, համաձայն որի` Կորոնավիրուսային հիվանդության (COVID-19) հետևանքով անձի մահվան դեպքում ախտաբանաանատոմիական հերձումներ չեն իրականացվի»:
«ՉԻ». Սա նշանակում է, որ իշխանությունները կորոնավիրուսի դեմ պայքարում բաց են թողել համաճարակի կանխարգելման շղթան: Այժմ վիրուսից մահացածներին չեն հերձելու: Թե ինչպես են որոշելու` մարդը կորոնավիրուսից է մահացել, թե մեկ այլ հիվանդությունից, պարզ չէ, բայց սա կարող է բազմաթիվ չարաշահումների տեղիք տալ: Ցանկացած հանգուցյալի կարող են կորոնավիրուսից մահանալու անվան ներքո չհերձել:
Լավ, ընդունենք, արտակարգ իրավիճակ է, այնպիսի պայմաններ են, որ հնարավոր չէ և նաև վտանգավոր է կորոնավիրուսից մահացածներին հերձել՝ վարակը կանխարգելելու համար:
Բայց արդյո՞ք իշխանություններն իրականացնում են բոլոր այն քայլերը, որոնք հնարավորինս կկանխարգելեին վիրուսի տարածումը: Դատելով Երևանի փողոցներից՝ ոչ:
Փողոցները շարունակում են մարդաշատ լինել, մարդիկ զբոսնում են, գնում-գալիս են: Մեռան ֆեյսբուքյան օգտատերերը լուսանկարներ հրապարակելով, որտեղ երևում է աշխույժ կյանքը երկրի տարբեր բնակավայրերում: Եթե կարանտին եք հայտարարել, ապա բարի եղեք վերջապես կարանտինի կանոններ հաստատել ամենուրեք: