Այն բանից հետո, երբ հայտնի դարձավ, որ պետական կառույցներում շարունակվում են ողջ ծավալով պարգևավճարներ բաժանվել, կարծում ենք, ժամանակն է՝ այդ հարցում մի կարևոր քայլ իրականացնել:
Անհրաժեշտ է կարանտինի ողջ ժամանակահատվածում, իսկ միգուցե՝ ավելի երկար, պետական բոլոր կառույցներում տրվող պարգևավճարները սառեցնել:
Այնուհետև հատուկ հիմնադրամ ստեղծել, պարգևավճարների համար նախատեսված գումարներն այնտեղ փոխանցել, և դա հատկացնել կորոնավիրուսի դեմ պայքարին անմիջականորեն ներգրավված մարդկանց. առաջին հերթին՝ բժիշկներին, որոնց ամիսը 3 հատ պարգևավճար էլ է հասնում, մարդիկ շաբաթներով տուն չեն գնում, առանց հերթափոխի աշխատում են, պարգևավճարը հենց իսկը նրանց համար է:
Նույն հիմնադրամից լրացուցիչ գումարներ վճարվեն նաև ոստիկաններին, ՃՈ տեսուչներին, ԱԻՆ և Ներքին Զորքերի, Պարեկապահակային ծառայության աշխատակիցներին: Բոլոր նրանց, որոնք այսօր շուրջօրյա ծառայություն են իրականացնում:
Թե չէ ահավոր տհաճ է, որ մի հատ պաշտոնյա՝ փորը տնկած, խրոխտ հայացքով հրապարակավ հայտարարում է, թե պարգևավճարը որոշել է չստանալ, տրամադրել կորոնավիրուսի դեմ պայքարին, բլա-բլա: Մի հատ գնացեք, հասարակ բուժքույրերի վիճակը տեսեք: Անքնությունից դեմքներն ուռել են: Հոգնածությունից տեղում ընկնում են:
Ախր սա մենք չպետք է հուշենք, սա իշխանությունները պետք է հասկանան ու իրենց նախաձեռնությամբ իրականացնեն վերոհիշյալ քայլերը: