Դեռևս հունիսի վերջին Արցախի նախագահ Արայիկ Հարությունյանը, հաջորդելով ՀՀ վարչապետ Նիկոլ Փաշինյանի վերջին օնլայն հարցուպատասխանին, հայտարարել էր․
1․ 2020 թվականի նոյեմբերի 9-ի հայտարարության 6-րդ կետում գրված է, որ մենք պետք է Բերձոր քաղաքից դուրս գանք: Անկախ ամեն ինչից՝ մենք Բերձորը պետք է շրջանցենք: Բերձորում մեր հայրենակիցների հետագայում ապրելու հնարավորությունը շատ քիչ եմ համարում։
2․ Աղավնոյի մասով՝ ԱՀ իշխանությունները շարունակում են բանակցությունները։ Աղավնոյում շարունակելու ենք մեր պայքարը:
3․ Սուս գյուղում մենք այսօր համարյա բնակիչ չունենք։ Որքան գիտեմ՝ սոցիալական ծրագրերի շրջանակներում, Բերձորի և Սուսի բնակիչները ստացել են իրենց համապատասխան փոխհատուցումները:
Վերջին օրերին պատերազմական գործողություններ վերսկսեցին վերոնշյալ հատվածներում։ Ունեցանք զոհեր ու վիրավորներ։ Իսկ այստեղ բնակվող մարդիկ մի քանի օր է սպասում են պատասխանի՝ ի՞նչ պետք է անել։ Միայն երեկ Արցախի իշխանությունները պաշտոնապես տեղեկացրել են, որ պետք է կազմակերպել Աղավնոյի, Ներքին Սուսի և Բերձորի բնակչության՝ մինչև սույն թվականի օգոստոսի 25-ը տարհանման հարցերը՝ քաղաքացիական պաշտպանության պլանի շրջանակներում։
Փաստացի ստացվում է, որ Արայիկ Հարությունյանը կամ ստել է, կամ էլ տեղյակ չէ, որ Բերձորի և Սուսի բնակիչները համապատասխան փոխհատուցումներ չեն ստացել։ Բնակիչները տարբեր լրատվամիջոցների հետ զրույցներում փաստել են, որ չգիտեն՝ ի՞նչ պետք է անել, որտե՞ղ պետք է մնան և ինչպե՞ս պետք է շարունակեն ապրել։ Սա՝ մեկ։
Երկրորդ՝ խոստացված պայքարը Աղավնոյի մասով չգիտենք էլ՝ ինչ անվանենք։ Երեկ Աղավնոյի գյուղապետ Անդրանիկ Չավուշյանը նշել է, որ ժամանակը տրված է, այդ ընթացքում պետք է բնակիչները դուրս գան իրենց տներից։ «Հրապարակ»-ի հետ զրույցում նա ասել է, որ գյուղն ունի 170 բնակիչ, պետությունը խոստացել է լուծել նրանց կեցության հարցերը, իսկ թե ինչպես և երբ, դեռևս հայտնի չէ. «Ասել են` լուծելու ենք այդ հարցը, ասել են` ով, որտեղ, ուզում է, ցանկանում է այդտեղ էլ կարող է մնալ։ Մենք պետք է ընտանիք֊ընտանիք ներկայացնենք։ Հեսա դուրս են գալու էլի բնակիչները»։ Արցախի իշխանությունները Աղավնոյի ժողովրդին փոխանցել են, որ մինչև օգոստոսի 25-ը պետք է լքեն իրենց տները, քանդեն իրենց գերեզմաններն ու հարազատների շիրիմները տեղափոխեն նոր բնակավայր։ Ամեն մեկն իր միջոցներով պետք է հարազատի շիրիմը փոխանցի։ Հա, ի դեպ, գյուղի խաչքարերը գյուղից դուրս են բերելու հենց գյուղացիները: «Բա ի՞նչ անենք, կներեք, թողնենք, գան, վրան միզեն, ինչի՞ համար թողնենք»,- ասել է գյուղապետը «Հրապարակ»-ի հետ զրույցում։
Արայիկ Հարությունյանը թող շարունակի պայքարը, մինչ այդ մարդիկ ընտանիքներով, հարազատների մասունքներով ու իրենց ունեցած-չունեցածով ճանապարհ են ընկնելու։ Եվ որևէ մեկի մտքով չի անցնելու ներողություն խնդրել այս մարդկանցից՝ նրանց մինչև վերջին վայրկյանը ստորաբար խաբելու, հետո էլ գաղթի ճանապարհին մենակ թողնելու համար։
Գոհար Վեզիրյան