«Դատական նիստի սկսվելուց րոպեներ առաջ, երբ ուղիղ հեռարձակումն արդեն միացած էր, լսվեց Սեյրան Օհանյանի ու Ռոբերտ Քոչարյանի կարճ երկխոսությունը. Սեյրան Օհանյան - Այսօր տոն է, չէ՞, շնորհավորում եմ, Շուշիի ազատագրման օրն է:
Ռոբերտ Քոչարյան- Որտե՞ղ էիր այս օրը:
Ս.Օ. - Ես՝ Ջանհասան-Քյոսալար ուղղությամբ:
Ռ.Ք. - Իսկ Լիսագո՞րը:
Ս.Օ.- Սկզբում այնտեղ, հետո նոր՝ Լիսագոր:
Վայրկյաններ տևած այս խոսակցությունից հետո դատավարությունը, մեծ հաշվով, կորցնում է իմաստը։ Ով ինչ կասի, ով ինչ կառարկի, ով ինչ կորոշի՝ պատմության տեսակետից չորրորդական է։ Բայց «ինչո՞ւ ենք մենք դարերով պետականություն կորցրել» հարցը գտնում է իր պատասխանը»։
Հուզիչ գրառման հեղինակը ԱԺ նախկին պատգամավոր Վահե Հովհաննիսյանն է, որն այժմ ղեկավարում է «Այլընտրանքային նախագծեր խումբը»:
«ՉԻ». Հիշեցնենք՝ Վահե Հովհաննիսյանը պատգամավոր է ընտրվել 2012 թվականին՝ Բարգավաճի ցուցակում Քոչարյանի ունեցած քվոտայի շրջանակներում:
Հիմա ինչ է ասում նախկին պատգամավորը: Ռոբերտ Քոչարյանը և Սեյրան Օհանյանը մասնակցել են Արցախի ազատագրմանը, ուրեմն նրանց դատելը պետականություն կորցնելուն հավասարազոր դրսևորում է:
Եվ սա ասում է մեկը, որը ցանկանում է իրեն ասոցացնել ժողովրդավարության և օրենքի գերակայության հետ: Այսինքն, եթե Քոչարյանը կռվել է, ուրեմն հետագայում հանցագործություններ կատարելու ինդուլգենցիա ունի: Վահե Հովհաննիսյանը հուզիչ գրառում անելուց առաջ ճիշտ կաներ դիտեր ամբողջ դատական նիստը: Կդիտեր և կտեսներ դատախազի դիպուկ արձագանքը՝ «այստեղ ոչ մեկին չեն դատում Շուշին ազատագրելու համար»:
Եվ ընդհանրապես Քոչարյանի կողմնակիցները պատմական էքսկուրսներ և գնահատականներ հնչեցնելուց պետք է հազար անգամ գցեն-բռնեն ու նոր միայն հրապարակայնացնեն իրենց մտքերը: Ըստ Հովհաննիսյանի տրամաբանության՝ երբ դատում էին Սամվել Բաբայանին, փորձում էին վերացնել Հայոց պետականությունը: Մի տեսակ սիրուն չի ստացվում: Աշխատավարձ են ստանում, որ պաշտպանեն Քոչարյանին, բայց այնպիսի գնահատականներ են հնչեցնում, որ ավելի դավաճանական են, քան պաշտոնապես առաջադրված մեղադրանքները: