«Հրապարակ» թերթը երեկ երեկոյան գրել է. «Մեր աղբյուրներով, հայկական կողմը կրակոցների մասին հայտնել է ռուսական կողմին: Վերջինս առաջարկել է մի քանի նռնականետ վերցնել, խումբ ուղարկել և այդ ադրբեջանական դիրքը հավասարեցնել հողին: Սակայն Հայաստանից չեն թույլատրել նման գործողություն իրականացնել: Մեր բանակին թույլատրված է միայն ավտոմատներով պատասխանել»:
«ՉԻ». Մեր աղբյուրներով էլ՝ «Հրապարակ» թերթի աղբյուրը ռուս խաղաղապահ զորքերում ծառայող մի հարբեցող է:
Մի ամիս առաջ էլ նույն աղբյուրը «Հրապարակ» թերթին վստահեցրել էր, թե իբր ռուսական խաղաղապահների ղեկավար Մուրադովը նյարդայնացել է և ձորն է նետել ադրբեջանական տեխնիկան: Այս լուսավոր դարում, երբ յուրաքանչյուրի ձեռքում երկու տեսախցիկ կա, ոչ մեկը չէր արձանագրել այդ սենսացիոն դեպքը:
Ռուսաստանը խիստ շահագրգռված է, որ հրադադարը պահպանվի, հատկապես՝ Արցախում: Ռուսաստանը Արցախում լայնամասշտաբ պատերազմի վերսկսում չի ցանկանա: Այդ մասին են վկայում Ռուսաստանի պաշտոնյաների ցանկացած հայտարարություն և դրանցում առկա ենթատեքստերը:
Ուստի «Հրապարակ» թերթը ճիշտ կանի՝ այս անգամ առանց հոնորարի թողնի աղբյուրին: