Արմեն Սարգսյան. Կենդանակերպի նշանը` Սբ. Առարկյալ
Այս համաստեղության տակ ծնվածների համար շաբաթը հագեցած կլինի պետականամետ իրադարձություններով:
Երկուշաբթի օրը համարյա հանդիպում կունենաք էկոնոմիկայի նախարար Վահան Քերոբյանի հետ:
Երեքշաբթի օրը դժգոհություն կհայտնեք առաջին անհրաժեշտության ապրանքների, հատկապես՝ պաղպաղակի թանկացման առթիվ:
Չորեքշաբթի օրը առավոտյան ձեր նստավայրում կընդունեք Գարեջրասերների միության վարչության փոխնախագահին. երեկոյան հանրությանը սթափության կոչ կանեք:
Հինգշաբթին ձկան օր է. զերծ կմնաք ընդդիմության, հետո՝ իշխանության խայծերը կուլ տալուց:
Ուրբաթը համերաշխության օր է. կստորագրեք վարչապետի ուղարկած բոլոր հրամանագրերն ու կբավարարեք ընդդիմության բոլոր պահանջները:
Շաբաթ և կիրակի օրերն անցկացրեք ընտանեկան միջավայրում. վայելեք Ամուլսարի գեղատեսիլ բնությունը:
«Չորրորդ իշխանություն», թիվ 12, 2021