Վարդան Ղուկասյան. Կենդանակերպի նշանը՝ Բուլդոգ
Այս շաբաթը հագեցած է պարանորմալ իրադարձություններով:
Երկուշաբթի օրը օնլայն-բանակցություններ Երևանի ստվերային կառավարության ձևավորման շուրջ. երեկոյան Հայկ Մարությանն ու Անդրանիկ Թևանյանը չաթից դուրս կգան:
Երեքշաբթի օրը Հակակոռուպցիոն կոմիտեն կհայտարարի, որ Վարդան Ղուկասյանի հանդեպ քրեական գործ է հարուցվել պետական միջոցները յուրացնելու համար. մինչ դուք կպատրաստվեք հերքել մեղադրանքները, կպարզվի, որ խոսքը Գյումրիի նախկին քաղաքապետի մասին է:
Չորեքշաբթի օրը Հակակոռուպցիոն կոմիտեն կհայտարարի, որ Վարդան Ղուկասյանը հանրային վայրում բազմիցս հայհոյանքներ է տվել. մինչ Գյումրիի նախկին քաղաքապետը կպատրաստվի հերքել մեղադրանքները, կպարզվի, որ խոսքը ձեր մասին է:
Հինգշաբթի օրը 2 ժամանոց լայվով կխոսեք Հայաստանի ներքաղաքական զարգացումների մասին. կառաջարկեք *** անել իշխանություններին, *** նախկին ընդդիմությանը, մեկ էլ կպնդեք, որ Ալիևը համաշխարհային *** է ու *** տղա:
Ուրբաթ օրը հեռակա կարգով կմասնակցեք Երևանի ավագանու անդրանիկ նիստին. ինչպես որ պահանջել էիք, ձեզ կփոխանցեն քաղաքապետարանի տեսախցիկների վերահսկման վարչությունը:
Շաբաթ-կիրակի պատրաստվեք ցնցող բացահայտումների. տեսախցիկներն ինչ ասես, որ չեն պարունակում: