Միլիոնների վնասներ են կրել
Ծաղկի մշակությամբ զբաղվողները դժվարին վիճակում են հայտնվել: Կորոնավիրուսը նրանց բիզնես գործերն է խառնել իրար: Արտակարգ դրությամբ պայմանավորված` ծաղկի շուկան, ինչպես նաև փոքր ու միջին առևտրի կետերի աշխատանքը դադարեցվել է:
Իրացում չլինելու պատճառով շատերն արդեն միլիոնների վնասներ են կրել:
«ՉԻ»-ի խմբագրություն ահազանգած ծաղկավաճառները դժգոհում են, որ իրենք զրկվում են ապրուստի միջոցից: Լրատվամիջոցից էլ ակնկալում են, որ իրենց ծանր վիճակի մասին բարձրաձայնի:
Արարատի մարզի Մխչյան համայնքի բնակիչ Վաղարշակ Սահակյանն արդեն աճեցրած մեխակների 2 խմբաքանակը թափել է: Նա 3000 մետր ջերմոցում մեխակ է մշակում: Ծաղիկը հիմա քաղելու է, բայց ռիսկ չի անում ջերմատուն մտնել: Սպառում չկա, իսկ անուշաբույր ծաղիկը երկար սպասել չի սիրում:
«Շիվարած վիճակում կանգնել եմ: Ծաղիկն էլ բացված կանգնած է, իրացում չկա «աբսալյուտնի»: Մոտ 30 000 քոլը բացված է»,- ներկայացրեց ֆերմերը:
Երկու անգամ մեխակը հավաքել է և աղբավայր տարել: 3000 հատ մեխակ մի քանի օր առաջ է դեն նետել, իսկ շուրջ 2500 հատն էլ` 2 օր առաջ: Հիմա էլ 5000 մեխակ կա հավաքելու: Ասում է՝ դա էլ աղբ կդառնա: 10 օրվա մեջ մոտ 1 միլիոն դրամի վնաս է կրել:
«Մեխակն օրումեջ քաղվում է: Եթե մինչև արտակարգ դրությունը մեծածախ գնով մեխակի մեկ հատը տվել եմ 100-120 դրամով, դե տեսեք՝ ինչքան գումար է կազմում: Շուտով էլ Զատիկ է և Մեռելոց, ծաղկի գներն այդ օրերին ավելի են բարձրանում: Բայց չենք կարող գումար աշխատել: Թափած 10 000 հատ ծաղիկը, որ 100 դրամով էլ հաշվենք, տեսեք ինչ գին է կազմում»,- սրտնեղեց Մխչյանի բնակիչը:
Ջերմոցի գազն անջատել են
Հիմա Վաղարշակ Սահակյանը մտածում է, թե ինչպես է վարկի տոկոսները մարելու: 60 միլիոն դրամի վարկ ունի, որից 15 միլիոնը սուբսիդավորված է: Այս տարի էլ նորից վարկ է վերցրել և ծաղկի ջերմոցն ավելացրել՝ հույս ունենալով, որ եկամուտ շատ կստանա, բայց համաճարակը ամեն ինչ խառնեց: Իսկ պարտքերը գնալով ավելանում են: Պարտք է արել և գազի գումարը վճարել:
Նույն վիճակում է նաև Դարակերտ համայնքի ֆերմեր Հովհաննես Հունանյանը: Գերբերա տեսակի ծաղիկն է քաղել և թափել:
«Արտահանում չկա: Շուկա էլ գոյություն չունի: Ծանր վիճակում ենք: Սնանկացման շեմին ենք»,- նկատեց նա:
Ջերմոցների մի մասն էլ առանց գազ են մնացել: Առևտուր չլինելու պատճառով չեն կարողացել նախորդ ամսվա սպառած գազի գումարը վճարել, իսկ այս օրերին գազի տեսուչները եկել են և անջատել:
Ընդառաջում են պահանջում
Ծաղկի մշակությամբ զբաղվող Գարիկ Ղազարյանն էլ ջերմատան աշխատողներին է տուն ուղարկել: Վաճառք չկա, գումար էլ հետը, աշխատողներին պահել չի կարող: 2000 մետր ջերմոցում վարդ է աճեցնում: 10 օրից ավել է՝ գումար չի աշխատել, բայց շարունակում է ծախս անել:
«Գազ ենք վառում, թունաքիմիկատ ենք առնում, որ ջերմոցում օգտագործենք: Վարդը շատ ծախս է պահանջում, դա լրիվ անում ենք: Ինչ անենք, հուսով ենք, որ ամեն ինչ շուտով կկարգավորվի և գոնե հացի գումար կկարողանանք աշխատել»,- ասաց նա:
Ծաղկի մշակությամբ զբաղվող ֆերմերները կառավարությունից օժանդակությունն են ակնկալում: Պահանջում են, որ պետությունն ընդառաջի և օգտագործած գազի գումարների վճարումը գոնե մեկ ամսով հետաձգի, այլապես ասում են, որ գյուղատնտեսության այս ճյուղը կվերանա:
Մանյա Պողոսյան
Հ. Գ. Ի դեպ, պարետի նոր որոշմամբ թույլատրվել է ծաղիկների, բույսերի առևտուրը մասնագիտացված խանութներում: