Պետությունը կսուբսիդավորի աշնանացան ցորենի սերմացուի ձեռքբերումը
Շիրակի մարզի Ախուրյանի տարածաշրջանում կոմբայնի վրա վերջին աշխատանքներն են կատարում՝ տեխնիկան գործի են դնում: Մեքենան արդեն պատրաստ է արտ մտնելու. մոտ 10 օրից ցորենը կհնձեն:
Ցորենի բերքն այս տարի վատը չէ: Թեև մարզի մի քանի համայնքում այս տարի կարկուտ եկավ, բայց հացահատիկի ցանքատարածություններին զգալի վնաս չի հասցվել: Եթե առաջիկայում էլ բնությունն անակնկալ չմատուցի, կհասցնեն բերքը դաշտից տուն բերել:
«Հեկտարից միջինը 45 ցենտներ ցորեն կլինի: Դա նորմալ՝ միջին բերք է»,- «ՉԻ»-ի հետ զրույցում հայտնեց Ախուրյան համայնքի ղեկավար Արծրունի Իգիթյանը:
Բայց այս տարի հողերի միայն մի մասում են ցորեն ցանել: Բերրի հողեր ունեն, որոնք անմշակ են մնացել ցորենի սերմացու չլինելու պատճառով:
Աշնանն արդեն ցորեն շատ կցանեն՝ շնորհիվ ցորենի արտադրության պետական նոր ծրագրի:
Հաստատվել է աշնանացան ցորենի արտադրությունը խթանող պետական աջակցության պիլոտային ծրագիրը:
Նախատեսվում է Շիրակի, Սյունիքի, Գեղարքունիքի, Լոռու, Արագածոտնի, Տավուշի և Կոտայքի մարզերում 2-20 հա մակերեսով ցորենի ցանքատարածություններ մշակող գյուղացիական տնտեսություններին վաճառվող աշնանացան ցորենի էլիտա 1-ին վերարտադրության հավաստագրված սերմերի գնի մասնակի սուբսիդավորում կամ փոխհատուցում։
Սուբսիդավորման փոխհատուցման գործընթացը կիրականացնի նախարարությունը։
1 կգ-ի համար տրվող սուբսիդիայի կամ փոխհատուցման գումարը սահմանվում է 70 դրամ, ինչը հնարավորություն կտա տնտեսավարողներին ձեռք բերել որակյալ սերմեր՝ շուկայական գնից առավել ցածր գնով։ Իսկ սա կնպաստի հանրապետությունում ցորենի բերքատվության մակարդակի բարձրացմանը՝ շուրջ 30 %-ով:
Ըստ վիճակագրության՝ տարեկան 250 000 տոննայից ավել ցորեն ենք ներմուծում: Բացը կարող ենք լրացնել աշնանացան ցորենի արտադրության խթանման պետական աջակցության այս պիլոտային ծրագրի միջոցով: Պետությունը 1-2 տարի կօգնի ֆերմերին՝ ցորենի էլիտար սերմացու գնելու հարցում:
Հացահատիկի ցանքատարածությունները կավելանան
Արծրունի Իգիթյանի խոսքով՝ ծրագիրը սպասված է: Վերջին տարիներին անընդհատ նման ծրագիր են առաջարկել պետությանը, այսօր արդեն կարծես սայլը տեղից շարժվում է:
Հիշեցնում է՝ մի քանի տարի առաջ նման ծրագիր կար, կարողանում էին լավ ցորեն ստանալ:
Շիրակը հանրապետության համար հացահատիկ ապահովող հիմնական մարզն է:
Ֆերմերներն ու մարզի գյուղատնտեսության ոլորտի պատասխանատուները վստահեցնում են՝ ամենաքիչը 1000 հեկտարով ցորենի ցանքատարածությունները կավելանան:
Այս տարի, սակայն, նախորդի համեմատ ավելի քիչ են հացահատիկ մշակել: Պատճառը սերմի բացակայությունն է եղել:
«Ծրագրի մասին, որ ժողովուրդը լսեց, արդեն հողում ցանքի նախնական աշխատանքները կատարում են: Հենց հիմա վարի աշխատանքներ են իրականացնում: Ծրագրից օգտվելու համար շատերն են դիմել: Մոտավորապես կարելի է կանխատեսել, որ նախորդ տարվա համեմատ 200 000 հեկտարի չափ ցանք կունենանք: Հացահատիկի ցանքը մոտ 20 000 հեկտարին կմոտենա: Մեր ամենալավ ցուցանիշը եղել է մոտ 24 000 հա»,- իր կանխատեսումները ներկայացրեց Շիրակի մարզպետարանի գյուղատնտեսության վարչության պետ Մովսես Մանուկյանը:
Այս տարի Շիրակում ցորենի ցանքատարածությունները 18 000 հեկտար են կազմել, ինչը նախորդ տարվա համեմատ պակաս է: Բերքատվության ցուցանիշն էլ բարձր չէ:
Մարզի գլխավոր գյուղատնտեսի խոսքով՝ միջին բերք են ստացել: Ջրովի հողատարածքից մեկ հեկտարից շուրջ 30 ցենտներ ցորեն կհավաքեն, իսկ անջրդի արտերից՝ 20 ցենտներ:
«Գարնանը սերմացուի պակաս կար: Կառավարությունը սերմացուի տրամադրման ծրագիրը կասեցրել էր: Հիմա նոր ծրագիր են առաջարկում: Ցորենի էլիտար տեսակի սերմացուի մեկ կիլոգրամի արժեքը 200-220 դրամ է, բայց 70 դրամը պետությունը կսուբսիդավորի, մոտ 150 դրամն էլ շահառուն կտա: Առաջին վերարտադրության ցորենի մեկ կիլոգրամի գինը կլինի 150-160 դրամ: Սերմը կարող են ներկրել Ռուսսատանի Դաշնությունից, Ուկրաինայից»,- նշեց նա:
Մովսես Մանուկյանը շտապեց տեղեկացնել, որ կարտոֆիլի բերքատվության աննախադեպ ցուցանիշ կլինի: Եթե եղանակն այս մի քանի ամիսն էլ հողագործի օգտին եղավ, արտակարգ կարտոֆիլ կլինի:
Մանյա Պողոսյան