Նախաձեռնող խմբեր են ձևավորվել
Այս օրերին ամենաշատ պահանջարկ ունեցող դիմակների պակասի հարցը քաղաքացիները փորձում են սեփական միջոցներով լուծել:
Սյունիքի մարզի Կապան քաղաքի դեղատներում դիմակ ևս դժվարությամբ է ճարվում: Մեծ մասում այն չկա, իսկ այն դեղատներում, որտեղ դիմակներ կան, թանկ արժեն: Գինը սկսվում է 250 դրամից:
Կապանի մի խումբ երիտասարդներ խնդրի լուծման ճանապարհը գտել են: Դիմակներ են պատրաստում: Այս պահին մոտ 15 կամավոր դիմակների պատրաստման գործով են զբաղվում: Կապանցիների մի մասն էլ օգնության են հասնում դիմակների պատրաստման համար անհրաժեշտ ապրանքներով:
Կապանցի Վահե Հայրապետյանը «ՉԻ»-ի հետ զրույցում պատմեց, որ այս պահին մոտ 250 հատ դիմակ են պատրաստել: Դրանցից 2 նմուշ ուղարկել են Կապանի բժշկական կենտրոն, որպեսզի փորձարկման համար ստերելիզացվեն, հետո դրանք անվճար կբաժանեն քաղաքի բնակիչներին:
«Ֆետրից՝ սինտիպոնից ենք պատրաստում: Էջմիածնի տղերքից ենք ճշտել, թե ինչով կարող ենք պատրաստել: Ասում են՝ դրանով ավելի հարմար է»,- մանրամասնեց նախաձեռնության հեղինակը:
Դիմակների խնդրի լուծումը Արարատի մարզի Նորամարգում համայնքում են գտել: Համայնքապետարանի ֆեյսբուքի էջից տեղեկանում ենք, որ համայնքապետարանի աշխատակիցները սեփական նախաձեռնությամբ դիմակներ են կարում, որպեսզի այն անվճար բաժանեն գյուղի սոցիալապես անապահով ընտանիքներին:
Մանյա Պողոսյան
Լուսանկարները՝ Նորամարգի համայնքապետարանի ֆեյսբուքի էջից:
