ԱԺ պատգամավոր Սոֆյա Հովսեփյանը ֆեյսբուքյան իր էջում գրել է. «Գիտեք սարսափեցնողը ո՞րն է, որ մարդիկ կան իրենց պլաստինկան չի փոխվում ու մնացել են «նախկինները» բառի տակ: Ասենք Սյունիքի, Վարդենիսի դիրքերի կահավորումից ես խոսում, ասում են դա 27 տարի պետք է արվեր, ոչ թե էս երեք տարում:
Տո այ անաստվածներ, նոյեմբերի 9-ից հետո է էդ մասը սահման դարձել, 27 տարի առաջ ի՞նչ անեին»:
«ՉԻ». Այս հարցին պետք է երկու կողմից նայել: Առաջինն այն է՝ իսկապես, նախկին իշխանությունները 20 տարի շարունակ ոչինչ չեն արել խաղաղություն հաստատելու համար, համարել են, որ 1990-ականներին Արցախի հարցը լուծել են, հետևաբար, Սյունիքից մինչև Վարդենիս սահմանները ամրացնելու, պաշտպանա-ինժեներական աշխատանքներ իրականացնելու կարիք չկա: Ինչի համար անեին, եթե սահմանը հարյուրավոր կիլոմետրերով հեռու էր այդ հատվածներից:
Հիմա, 44-օրյա պատերազմից հետո, ադրբեջանցիները եկել, հասել են նոր սահմաններ: Որտեղ ոչ մի դիրքեր չունենք: Իշխանություններն էլ մինչև հիմա չեն հասկացել, որ պատերազմը դեռ չի ավարտվել, մտածում են, որ այլևս ապագա կա, ինչպես նաև ռուսներ կան, հետևաբար, հայ-ադրբեջանական սահմանը ամրացնելու, նոր դիրքեր կառուցելու շտապ կարիք չկա: Թե բան լինի, ռուսները կմիջամտեն: Ու հիմա ունենք այսպիսի վիճակ:
Բայց Սոֆյա Հովսեփյանը թող շատ չվրդովվի: Մենք իրեն դեռ կանդրադառնանք: Որքան հիշում ենք, սա այն պատգամավորն էր, որը նույնպես համարում էր, որ Արցախի հարցը լուծված է և կենդանի արարածներ էր բնորոշում բոլոր նրանց, ովքեր խոսում էին խաղաղության կամ փոխզիջումների անհրաժեշտության մասին: