Սիրիական խոհանոցում մսային ուտեստներից գերակշռում են ոչխարի, գառան և հավի մսերը: Դրանք ամբողջական տապակում են ջեռոցում կամ ածուխի վրա, խճողակի են վերածում ու կոտլետ անում կամ էլ խորոված անում: Մի խոսքով՝ մսի պատրաստման հարցում սիրիացիների երևակայությունն անսպառ է:
Եվ չնայած ստորև ներկայացվող բաղադրատոմսի պարզությանը, ուրցն ու սխտորի փոշին և որ ամենակարևորն է՝ ածուխը, իսկական հրաշքներ են գործում ձեթի մեջ մարինացված ճուտի հետ:
Ուտեստն սկսեք պատրաստել մատուցելուց 3-5 ժամ առաջ:
Բաղադրիչները
4 բաժնի համար
- 2 ճուտ՝ յուրաքանչյուրը 700-800գ
Մարինադի համար
- 3/4 բաժակ ձիթապտղի ձեթ
- 3/4 բաժակ կիտրոնի հյութ
- 2 ճ.գ. չորացրած ուրց
- 1 ճ.գ. սխտորի փոշի
- աղ
- աղացած սև պղպեղ
Պատրաստման եղանակը
- Ճտերը կրծքի հատվածից 2 մասի բաժանեք: Կենտրոնական ոսկորը կռճիկների հետ միասին հեռացրեք:
- Ճտերը ծածկեք կերակրի թաղանթով, ուժգին սեղմեք մինչև լրիվ տափակեն: Կերակրի թաղանթը հեռացրեք, ճտերը տեղադրեք բարձր ծայրերով ափսեի մեջ:
- Մարինադի բոլոր բաղադրիչները խառնեք, խառնուրդը լցրեք ճտերի վրա և 2-4 ժամ պահեք սառը տեղում (պարտադիր չէ՝ սառնարանում):
- Մինչ ճտերը մարինացվում են, վառեք ածուխը. այն պետք է լավ այրվի և սպիտակ մոխրով պատվի: Գրիլի ցանցը լավ թեժացրեք, ձեռնոցով մի ձեռքով պահելով՝ մյուս ձեռքով ցանցը պատեք ձեթով: Ցանցը տեղադրեք ածուխից 20-25սմ բարձրության վրա:
- Ճտերը հանեք մարինադից, 5 րոպե դրեք քամիչի մեջ, որպեսզի ձեթը քամվի: Մարինադը պահեք:
- Ճտերը մաշկը դեպի ներքև շարեք ցանցի վրա, 25-30 րոպե տապակեք՝ յուրաքանչյուր 10 րոպեն մեկ վրան մարինադ քսելով: Ճտերը շրջեք, ևս 10 րոպե տապակեք:
- Մատուցեք շատ տաք վիճակում:
Խորհուրդ: Ճտերը լավ է մատուցել յոգուրդի և անանուխի սոուսի հետ, հասարակ կանաչ աղցանով կամ վարունգի հետ մեկտեղ: