Բելառուսական ընդդիմության առաջնորդ Սվետլանա Տիխանովսկայան Եվրախորհրդարանում Եվրանեսթի կոնգրեսի ժամանակ հանդիպել է ՀՀ ԱԺ նախագահ Ալեն Սիմոնյանի հետ: Բարձրացվել է Բելառուսի ուժայինների պահանջով ձերբակալված Նովիկովի հարցը։ Հայաստանի ներկայացուցիչները հայտնել են, որ նա քաղաքական ապաստան կստանա, հաղորդում է Տիխանովսկայայի մամուլի ծառայությունը:
«ՉԻ». Այս տեմպերով շարունակվի, ՀՀ ԱԺ նախագահը կարող է նաև հանդիպել Լեհաստանի ֆերմերների ասոցիացիայի, Գերմանիայի գարեջրագործների միության, Լատվիայի երգի փառատոնների ֆորումի ղեկավարների հետ, հետները գյալաջի տա, սուրճի բաժակի շուրջ քննարկի աշխարհաքաղաքական և իրավական հարցեր:
Առավել ևս պարզ չէ, թե Հայաստանի այդ ի՞նչ ներկայացուցիչներ են հայտնել, որ ինչ-որ Նովիկով քաղաքական ապաստան պետք է ստանա: Որքան գիտենք, քաղաքական ապաստան տալը բավական երկար իրավական գործընթաց է, որը պետք է քննարկվի, բազմաթիվ հարցումներ իրականացվեն, ճշտվեն հարցի մանրամասները: Բայց պարզվում է, որ ուղղակի կարելի է «հորս արև, հարց չկա» կարգի հավաստիացումներով բավարարել ապաստան տալու հարցը:
Չնայած, մյուս կողմից՝ Ալեն Սիմոնյանը երևի Եվրանեսթում ուրիշ կարևոր հանդիպում չի կարողացել կպցնել, ստիպված բավարարվել է Բելառուսի ընդդիմության առաջնորդով: