Երեկ Ռոբերտ Քոչարյանի պաշտպան Արամ Վարդևանյանը, անդրադառնալով մեղադրանքներին, թե դատական նիստերը պաշտպանական կողմի պատճառով անհարկի հետաձգվում են, նշել է՝ դատաքննության ձգձգման համար մեղավոր են Գլխավոր դատախազությունն ու ՀՔԾ-Ն՝ 80 հատոր գործ դատարան ուղարկելու համար:
«ՉԻ». Դժվար է ասել, թե ինչով է ավարտվելու այս դատավարությունը, սակայն Քոչարյանի պաշտպանները հաստատ նոր խոսք են ասելու համաշխարհային իրավագիտության մեջ: Փաստորեն, եթե մեղադրանքի կողմը գտել է 80 հատորի նյութ, պետք է դրանք չընդգրկեր վարույթի մեջ, այլ զբաղվեր դրանց կրճատմամբ:
Ի՞նչ կապ ունի 80 հատորը, եթե Քոչարյանի պաշտպանները նույն դատավորին առնվազն 4 անգամ բացարկ են հայտնում: Նույն բանը անում են դատախազների նկատմամբ:
Ի՞նչ կապ ունի 80 հատորը, եթե Իզմիրլյան հիվանդանոցի բժիշկներն անընդհատ բացում-փակում էին Քոչարյանի մարմինը:
Ի՞նչ կապ ունի 80 հատորը, եթե միակ տղամարդը վախենում էր կորոնավիրուսից և հրաժարվում էր նիստերին մասնակցելուց:
Ի՞նչ կապ ունի 80 հատորը, եթե պաշտպանները դատաքննության ժամանակ խոսում են ամեն ինչից, բացի բուն մեղադրանքից:
Ի՞նչ կապ ունի 80 հատորը, որ վերջին 32 տարիներին Հայաստանում ապրող Յուրի Խաչատուրովը չի տիրապետում հայոց լեզվին:
Այն շոուն, որ դատարանում բեմադրում են Քոչարյանի փաստաբանները և վերջերս նրանց միացած Աննա Դանիբեկյանը, կշարժեր անգամ «Կուշտունիցայի» նախանձը:
Հուսով ենք, որ գոնե փաստաբանները Քոչարյանի հետ ժամավճար են պայմանավորվել և ոչ թե արդարացման դատավճիռ: