Վայոց ձորի մարզի Ջերմուկ համայնքի բնակիչները պատրաստվում են նաև ձմռանը փակ պահել Ամուլսար տանող ճանապարհը: Այսօր Ամուլսարի պահապանները կրկին հավաքվելու են և քննարկելու իրենց առաջիկա անելիքները:
«Ամուլսար անող ճանապարհները չեն բացվելու, հիմա քննարկում ենք վառելիքի հարցը, որ շարունակենք հերթապահություն իրականացնել»,- «ՉԻ»-ի հետ զրույցում հայտնեց Ջերմուկի բնակիչ Շիրակ Բունիաթյանը:
Մեր զրուցակիցը վստահեցնում է, որ ոստիկանության ուժերի կողմից իրենց վրա ճնշումներ չեն գործադրվում, բայց որոշակի խմբեր Ամուլսարի համար պայքարողներին սպառնում են:
«Վերջին շրջանում կան մարդիկ, որ պաշտոններ զբաղեցնելով, փորձում են իրենց լծակներն օգտագործել և բնակիչներին հանդիպում են և առաջարկում, որ պոստեր չգնան, ասում են՝ եթե գնաք, կմիջնորդենք, որ կորցնեք ձեր աշխատանքը»,- պատմեց Ջերմուկի բնակիչը:
Շիրակ Բունիաթյանը դեռ չի ուզում փակագծեր բացել և անուններ տալ: Խոստանում է, որ առաջիկայում փաստերով այն կներկայացնեն և պարզ կլինի, թե ովքեր են նրանք:
«Կպարզվի, թե այդ մարդիկ սեփական նախաձեռնությամբ են այդպես անո՞ւմ, թե՞ ուղղորդված են և հրահանգներ են կատարում: Չի կարող Ջերմուկում Ամուլսարի հետ կապված ճնշում լինի բնակիչների նկատմամբ:
Հեղափոխությունը դեռևս մարզեր չի հասել, շատ պաշտոններում դեռևս շարունակում են պաշտոնավարել նախկինների մարդիկ: Ճիշտ է, նրանք նոր իշխանության համակարգում են, բայց նոր իշխանության կադրերը չեն: Չենք ուզում պատկերացնել, որ այդ մարդիկ իրենց արատավոր գործելաոճը շարունակում են իշխանության հրահանգավորմամբ: Չենք հավատում դրան, քանի որ հեղափոխությունն արատավորը հեռացնելու նպատակով էր:
Բնակչությունը ոտքի կանգնեց, որ մերժի այդ արատավորը, ոչ թե եթե դու ունես լծակ, բնակչին կանչես և ասես՝ նայիր գործից կհանենք»,- նշեց նա:
Ջերմուկի բնակիչները պնդում են, որ Ամուլսարի հարցով իրենց դիրքորոշումը չի փոխվել: Բունիաթյանի խոսքով՝ հիմա պայքարի պասիվ ձևն են ընտրել, քանի որ չեն ուզում իրավիճակը լարել:
«Մենք այն մարդիկ ենք, ովքեր կիսում են հեղափոխության գաղափարը և պետք չէ, որ Հայաստանը գնա ինչ-որ ցնցումների: Դա չի նշանակում, որ մենք նահանջում ենք: Մենք շարունակելու ենք իրացնել սահմանադրությամբ մեզ տրված իրավունքը, այսինքն՝ պայքարել շրջակա միջավայրի համար»,- ասաց նա:
Ջերմուկցիները կարծում են, որ կառավարությունը հարցին խելամիտ լուծում կտա:
Մանյա Պողոսյան