Արդեն երկու օր է՝ տեղեկություններ են տարածվում, որ «Հայրենիք» կուսակցության առաջնորդ Արթուր Վանեցյանն ու ՀՅԴ ԳՄ ներկայացուցիչ Իշխան Սաղաթելյանը շատ թեժ վիճաբանել են: Իրավիճակն այնքան լարված է եղել, որ այն վերածվել է ծեծկռտուքի: Ըստ շրջանառվող տեղեկությունների՝ Արթուր Վանեցյանը հարվածել է Իշխան Սաղաթելյանին, ու վերջիններս այժմ միմյանց հետ որևէ շփում չունեն:
Armlur-ի հետ զրույցում Վանեցյանը կոչ է արել իրավապահ համակարգի ուշադրությունը հրավիրել նման ֆեյք լուրերի վրա՝ հորդորելով հայտնաբերել այն անձանց, որոնք զբաղված են նման կեղծ ինֆորմացիաներ տարածելով: «Սա վնասում է մեր հեղինակությանը, և նման զրպարտություններ տարածողները պետք է հայտնաբերվեն ու պատասխանատվության ենթարկվեն օրենքի առջև»,- եզրափակել է Վանեցյանը:
«ՉԻ». Տպավորություն է, որ Վանեցյանը մերթընդմերթ է հետևում Հայաստանի ներքաղաքական անցուդարձին: Մոտավորապես հոբբիի նման. ունենում է ազատ ժամանակ՝ հետևում է, չի ունենում՝ դե ինչ արած:
Շաբաթ օրվանից «Հայրենիք» կուսակցության ներկայացուցիչները քննադատում, ծաղրում և անարգանքի սյունին են գամում ԱԱԾ-ին, որ գործերը թողած՝ զբաղված է Գագիկ Սողոմոնյան ֆեյքի բացահայտմամբ: Նրանք ասում են, որ հազար ու մի լուրջ մարտահրավեր կա, ի՞նչ իմաստ ունի ռեսուրս ծախսել և մի հայհոյախոս ֆեյքի բացահայտել:
Եվ հիմա, Վանեցյանը իրավապահ համակարգին կոչ է անում բացահայտել, թե ով է փչացնում իր և Սաղաթելյանի հարաբերությունները: Քաղաքական գործիչը չգիտի, որ նման լուրերը ընդամենը հերքում են և ոչ թե հետաքննություն պահանջում:
Նույն հաջողությամբ մեր շենքի տիկին Վարսիկը կարող է դիմել իրավապահ մարմիններին՝ պահանջելով բացահայտել, թե ովքեր են լուրեր տարածում, թե իբր իր հարաբերությունները վատացել են 4-րդ հարկի տիկին Փառանձեմի հետ:
Չես խփել, ուրեմն չես խփել, ի՞նչ արած: Հաջորդ իսկ հանրահավաքին ջերմորեն գրկախառնվիր Սաղաթելյանի հետ, համբուրիր ճակատը, մի քանի մետր թևանցուկ քայլեք, և բոլորը կհասկանան, որ իշխանությունը զբաղված է ապատեղեկատվություն տարածելով: Բոլորը կհասկանան, որ իշխանությունը խանդում է ձեր ընկերությանը: Կարող եք անգամ հաջորդ իսկ հնարավորության դեպքում Սաղաթելյանի հետ վազել, բոլորը կհասկանան, որ ձեր միջև սեպ խրել հնարավոր չէ: