Մենք, իհարկե, դեռ 1996թ. Լիսաբոնի գագաթնաժողովի շուրջ էժանագին շահարկումներին կանդրադառնանք, համբերեք, բայց այս անգամ ուղղակի հիշեցնենք, որ տարիներ առաջ մեր իշխանությունները Ղարաբաղի հարցում նույնքան իրար հակասող հայտարարություններ էին անում, որքան հիմա: Ընդ որում, դրանցից շատերը դարձան թևավոր: Ինչպես 100 տարվա մասին խոսքը:
Ներկայացնենք 20 տարվա վաղեմության հոդված, որ հասկանալի լինի, թե ինչ էր ասում իշխանությունը, և որքան դիպուկ գնահատականներ է տվել ընդդիմությունը:
««Արդարություն» խմբակցության քարտուղար Վիկտոր Դալլաքյանը անդրադարձավ Հայաստանի արտաքին գործերի նախարար Վարդան Օսկանյանի երեկվա հայտարարություններին:
Վիկտոր Դալլաքյանի փոխանցմամբ, արտգործնախարարի ելույթը նման էր դաշտային հրամանատարի կողմից արված տղայական հայտարարության: Խոսքը մասնավորապես վերաբերում է Լեռնային Ղարաբաղի հակամարտության կարգավորման մասին ասվածին, թե «Հայաստանը կարող է ոչ միայն գոյատևել, այլև զարգանալ և հաջորդ 100 տարիներին կզարգանա առանց երկաթգծերի, նավթամուղերի, - մեջբերեց խմբակցության քարտուղարը,- եթե արտաքին գործերի նախարարը ասում է, որ 100 տարի մենք կարող ենք շրջափակման պայմաններում ապրել և զարգանալ՝ սրանից վտանգավոր բա՞ն: Այսինքն՝ ինչո՞ւ եմ ես տղայական գնահատում, որովհետև սա մարտահրավեր է ամբողջ աշխարհին»:
«Արդարություն» խմբակցության քարտուղարի համոզմամբ, Հայաստանի իշխանությունների վարած քաղաքականության արդյունքում այսօր Լեռնային Ղարաբաղի հարցում Հայաստանի համար անբարենպաստ իրավիճակ է ստեղծվել:
Վիկտոր Դալլաքյանի փոխանցմամբ, Թերի Դևիսի զեկույցը Լեռնային Ղարաբաղի հակամարտության կարգավորման շուրջ ոչ թե միայն Թերի Դևիսի, այլև Եվրոպայի խորհրդի դիրքորոշումն է, որն այնքան էլ բարենպաստ չէ Լեռնային Ղարաբաղի համար: Նա որպես ապացույց մեջբերեց նաև ԵԱՀԿ Մինսկի խմբի ամերիկացի համանախագահ Սթիվեն Մանի վերջերս արած հայտարարությունը, թե Ադրբեջանի մի զգալի մասը օկուպացված է:
Այսօր, ըստ բանախոսի, Ադրբեջանի տարածքային ամբողջականությունը ճանաչում են Ռուսաստանը, Չինաստանը, նաև հարևան Իրանը:
Եզրակացությունը հետևյալն է. «Եթե աշխարհի գերտերությունները ճանաչում են Ադրբեջանի տարածքային ամբողջականությունը՝ դրանով նրանք Ադրբեջանին ասում են, որ իրենք կարող են իրենց տարածքային ամբողջականությունը վերականգնել, և սրանից վտանգավոր բան չկա մեզ համար: Այսինքն՝ ամբողջ աշխարհն ունի այս դիրքորոշումը, իսկ Օսկանյանն ասում է, թե՝ «դե թող մեկը մեզ բան ասի», ասաց Դալլաքյանը», 23.09.2004թ.»: