Մեծ է արդարադատության նախկին նախարար Դավիթ Հարությունյանի ներդրումը երկրի կեղեքման գործում անձամբ, և՛ Ռոբերտ Քոչարյանի, և՛ Սերժ Սարգսյանի համար օրենսդրական ապահովումը։ Հիմա նա երբեմն առ երբեմն արտահայտվում է նոր Հայաստանի կարևոր օրենսդրական նախաձեռնությունների դեմ։ Վերատպելով տարիներ առաջ «Չորրորդ իշխանություն» թերթում հրապարակված հոդվածը, ցանկանում ենք ինչ-որ չափով լույս սփռել Դավիթ Հարությունյանի իրական կերպարի վրա։
«Չորրորդ իշխանություն», մարտ, 2013 թ.
Մեր ընթերցողների ուշադրությանն ենք ներկայացնում ՀՀԿ-ական պատգամավոր Դավիթ Հարությունյանի` «քաղաքական գործունեության» շնորհիվ արձանագրած «տնտեսական հաջողությունները»։
Ընդգծենք, որ «ՉԻ»-ն հավաքագրել է այս տարիներին ինչպես տեղական, այնպես էլ ռուսական մամուլի տարբեր միջոցների կողմից հրապարակված և այդպես էլ չհերքված տեղեկությունները Հարությունյանի մասին։
Դավիթ Հարությունյանին և նրա եղբայրներին է պատկանում «Հարությունյան և գործընկերներ» իրավախորհրդատվական ընկերությունը, որը իրավախորհրդատվական ծառայություններ է մատուցում բազմաթիվ խոշոր ընկերությունների և ուշագրավ կենսագրություն ունեցող անհատների։ «Հարությունյան և գործընկերները», մասնավորապես, պաշտպանում է Հյուսիսային պողոտայում կառուցապատում իրականացնող որոշ ընկերությունների շահերը (այդ թվում` «Գլենդել Հիլզ» ընկերության շահերը, որը ևս կապում են Հարությունյան ընտանիքի հետ)։ «Հարությունյան և գործընկերները» Վիվասել-MTC-ի և «Air Armenia» ընկերության իրավախորհրդատուն է։ Այս ընկերության գործընկերներից է նաև Հայաստանում Գրիքոր Աղաբեկյան անուն-ազգանունով հայտնի սփյուռքահայ գործարարը, որը ներկայում ազատազրկված է Ֆրանսիայում` մանկապղծության և սատանիզմի մեղադրանքով, որի ազատազրկման հարցում, ի դեպ, գործուն մասնակցություն է ունեցել նաև Վատիկանը։ Աղաբեկյանի իրական անուն-ազգանունը հայտնի չէ, քանի որ վերջինիս հայկական տարբեր համայնքներում տարբեր անուններով են ճանաչում։ Նա ԱՄՆ, Լիբանանի, Ֆրանսիայի, Ավստրալիայի քաղաքացիություն ունի, իսկ ձերբակալությունից առաջ էլ, ըստ որոշ տեղեկությունների, պլաստիկ վիրահատությամբ ամբողջությամբ փոխել էր իր դեմքն ու մատնահետքերը, ինչի պատճառով էլ ձերբակալության ժամանակ լուրջ խնդիրներ էին առաջացել Ֆրանսիայում։ Աղաբեկյանը, ըստ որոշ տեղեկությունների, ժամանակին բարեգործական կազմակերպություն ուներ, որի միջոցով Հայաստանից երեխաներ էր տանում «դրսում» հանգստանալու։ Սույն Աղաբեկյանը նաև վերջին նախագահական ընտրություններից առաջ բավական մեծ գումար է փոխանցել հայաստանյան իր մտերիմներին` ի աջակցություն Սերժ Սարգսյանի. ըստ որոշ տեղեկությունների, խոսքը 4 մլն դոլարի մասին է։ Ասում են նաև, որ վերոնշյալ Աղաբեկյանին նաև մեծ գումար է պարտք Հանրային հեռուստաընկերության տնօրեն Ալիկ Հարությունյանը։ Աղաբեկյանը, ըստ իշխանական շրջանակներում շրջանառվող տեղեկությունների, ծնվել է Լիբանանում, հարստացել է քաղաքացիական պատերազմի տարիներին` զենքի վաճառքի շնորհիվ։ Ասում են նաև, որ տարիներ առաջ, երբ Սերժ Սարգսյանի եղբայր Սաշիկ Սարգսյանը խնդիրներ է ունեցել ԱՄՆ-ում, վերջինս այդ խնդիրները լուծել է հենց Աղաբեկյանի միջոցով։ Հայտնի չէ, սակայն, թե այդ ժամանակ, Գրիքոր Աղաբեկյանը ԱՄՆ-ում ինչ անուն-ազգանունով էր հանդես գալիս» («Ժամանակ» օրաթերթ, 2011թ., հրապարակման վերնագիրը` «ԵԽԽՎ-ն քննարկում է Դավիթ Հարությունյանի վերջը» )։
Դավիթ Հարությունյանը և «Գլենդել Հիլզը»
Երևանցիներից շատերին և հատկապես անօթևան դարձած բազմաթիվ մարդկանց ծանոթ է այս կազմակերպությունը, որը զբաղվում է կառուցապատման աշխատանքներով։ Ոչ վաղ անցյալում` լրագրողական հետաքննության շնորհիվ` հրապարակվեցին փաստեր, համաձայն որոնց` «Գլենդել Հիլզը» կապ ունի նաև Դավիթ Հարությունյանի հետ։ Այդ կապը իրականացվում է սփյուռքահայ գործարար Վահե Յաղուբյանի միջոցով, որը փաստացի ներկայանում է որպես ընկերության սեփականատերերից մեկը և ժամանակին աշխատել է «Հարությունյան և գործընկերներ» իրավախորհրդատվական ընկերությունում, Արդարադատության նախարարությունում (Դավիթ Հարությունյանի օրոք), ինչպես նաև քավոր-սանիկական կապեր ունի Դավիթ Հարությունյանի հետ։ Ի դեպ` այս ընկերությունը կառուցապատման աշխատանքներ է իրականացրել հիմնականում Գլխավոր պողոտայում, Գյումրիում և Սպիտակում։
Իրացման գոտու բնակիչներից իրենց տները հնարավորինս էժան և արագ խլելու գործում կրկին իր դերակատարությունն է ունեցել Դավիթ Հարությունյանը, ում արդարադատության նախարար եղած ժամանակ և ում նախաձեռնությամբ էլ փոփոխություններ կատարվեցին Հողային և Քաղաքացիական օրենսգրքում, և ում եղբայրներին պատկանող իրավախորհրդատվական ընկերությունը նորից հանդես էր գալիս որպես կառուցապատողի շահերի պաշտպան։ «Գլենդել Հիլզի» պարագայում հարկ է նաև նշել վերջինիս իրականացրած խայտառակ անորակ շինարարական աշխատանքները։ Ընդ որում, խոսքը այնքան անորակ աշխատանքների մասին է, որ այդ փաստին ամիսներ առաջ ստիպված է եղել անդրադառնալ նույնիսկ Սերժ Սարգսյանը, իսկ Գյումրիում շահագործման հանձնված նորակառույց բնակարաններից մեկի առաստաղը` շահագործման հանձնումից օրեր անց ինքնափլուզվել էր («iLur.am» էլեկտրոնային կայք, 2013թ., հրապարակման վերնագիրը` «Դավիթ Հարությունյանը, «Գլենդեյլ Հիլզ»-ը և Մուշ-2-ի անորակ բնակարանները»)։
Դավիթ Հարությունյանը «տեր» է «Գլենդել Հիլզին» նույնիսկ Եվրադատարանում
«Իրացման գոտու մի շարք բնակիչներ, ինչպես հայտնի է, զրկվելով իրենց տներից և անցնելով հայաստանյան դատական համակարգի միջով, հասել են Եվրադատարան։ Թե՛ ներպետական դատարաններում և թե՛ հատկապես Եվրադատարանում Հայաստանի կառավարության կողմից ընդգծված մոտեցում կա հատկապես այն գործերի հանդեպ, որոնք առնչվում են «Գլենդել Հիլզին»։ Ներպետական դատական ատյաններում ՀՀ կառավարության կողմից ներկայացված բոլոր այն հարցերը, որոնք վերաբերում էին «Գլենդել Հիլզ» ՓԲԸ-ին հատկացված հողատարածքում իրականացված իրացման գործերին, դատարանների կողմից բավարարվում էին շատ արագ, իսկ դրանցից ոմանք` նույնիսկ արագացված ընթացակարգերով, երբեմն նույնիսկ հնարավորություն չտալով պատասխանողներին դիրքորոշում արտահայտել»,- մի առիթով հայտարարել է Եվրադատարանում` ընդդեմ ՀՀ-ի ներկայացված մի շարք գործերով դիմողների ներկայացուցիչ, փաստաբան Վահե Գրիգորյանը։ Ըստ նրա` բոլոր դեպքերում կայացվում էին քաղաքացիներին վտարելու և կամ սեփականազրկելու վճիռներ։ Միաժամանակ, քաղաքացիների ներկայացրած որևէ միջնորդություն, դիմում կամ բողոք դատական ատյանների կողմից չէր բավարարվում։ Անգամ ԴԱՀԿ-ն էր «Գլենդել Հիլզին» առնչվող դատական ակտերը ի կատար ածում կայծակնային արագությամբ, և շատ դեպքերում հենց ԴԱՀԿ-ն էր դուրս գալիս դատական ակտի պահանջների սահմաններից։ Վահե Գրիգորյանը որպես օրինակ մատնանշել է «Թունյանն ընդդեմ ՀՀ-ի» գործը, որտեղ տիկին Թունյանի ընտանիքի մի քանի անդամ, որոնց անունները նշված չեն եղել դատական ակտում, հարկադիր կատարողների կողմից ապօրինաբար վտարվել են իրենց բնակարաններից` առանց դատական ակտի։
Փաստաբանի խոսքով, Եվրադատարանում ՀՀ-ի դեմ ներկայացված գործերի քննության ժամանակ, եթե այլ ընկերությունների հատկացված հողատարածքներում անձանց վտարման վերաբերյալ գործերով ՀՀ կառավարությունը երբեմն հրաժարվում է առարկություններ ներկայացնել, ապա «Գլենդել Հիլզի» դեպքում մշտապես ներկայացնում է երկարաշունչ, թեկուզև անբովանդակ առարկություններ։ «Սա կարող է տպավորություն ստեղծել, որ կոնկրետ Արդարադատության նախարարության համապատասխան ստորաբաժանումը ընդգծված վերաբերմունք ունի հատկապես «Գլենդել Հիլզի» հանդեպ»,- այսպիսի հայտարարություն է արել փաստաբանն այն ժամանակ, երբ դեռ Դավիթ Հարությունյանը ՀՀ արդարադատության նախարարն էր։
Գոհար Վեզիրյան