ԱԺ նախագահ Ալեն Սիմոնյանը «Ազատության» այն հարցին, թե ինչո՞ւ սահմանը չստանալ համապատասխան այնտեղ, որտեղ որ ադրբեջանցիներն են ներխուժել Հայաստանի ինքնիշխան տարածք, ասել է. «Նախ չի ասվում, որ նման բան չի լինելու: Երկրորդ՝ որովհետև իրանց տիրապետության տակ հայկական բնակավայր այս պահին չկա, դրա համար նման բան անելն անհնար է»:
«ՉԻ». Բա որ այդպես էր, Տավուշի մարզի այդ հանձնվող չորս գյուղերը հողին հավասարեցնեիք, տեղը յոնջա ցանեիք, հետո ասեիք, որ հայկական տիրապետության տակ ոչ մի բնակավայր չկա:
Ադրբեջանցիներն էլ կգային, իրենց սեփական աչքերով կտեսնեին, որ իսկապես բնակավայր չկա՝ հոգոց հանելով ետ կվերցնեին տարածքային պահանջները:
Մինչև հիմա մեր իմացած սահմանազատման գործընթացներն իրականացվել են «տարածք՝ տարածքի դիմաց» սկզբունքով:
Ենթադրում ենք, որ բանակցությունների ժամանակ ադրբեջանցիներն ասել են՝ էդ չորս գյուղերը պիտի տաք, թե չէ կհարձակվենք: Մերոնք ասել են՝ բա տենց ո՞նց կլինի, ժողովրդին ի՞նչ ասենք, ախր շատ միակողմանի է, է՜, հակառակորդն էլ խորհուրդ է տվել, թե բա բացատրեք, որ հլը որ մենակ բնակավայրերի հարցն ենք լուծում, դե, քանի որ դուք էլ բնակավայր չունեք, դրա համար է միակողմանի ստացվում, բայց արխային, սաղ լավ է լինելու: