«Ազգային միաբանություն» կուսակցության նախագահ Արտաշես Գեղամյանը՝ անդրադառնալով մոտ երկու տարի առաջ Հայաստանում տեղի ունեցած հեղափոխությանը, այնուհետև խորհրդարանական արտահերթ ընտրություններին, ասել է. «Դե, որ Նիկոլ Փաշինյանը 70% ձայն էր ստացել, ուրեմն թող ճանաչեր Արցախի անկախությունը, թող այնպես աներ, որ Արցախը դառնա բանակցային կողմ»:
«ՉԻ». Սպանիչ տրամաբանություն է: Իբր քննադատելով իշխանություններին, Արտաշես Գեղամյանը՝ ինքն էլ չհասկանալով, ոչ լեգիտիմ է համարել Ռոբերտ Քոչարյանին ու Սերժ Սարգսյանին:
Այսինքն, եթե իշխանությունը լեգիտիմ է, ստացել է ժողովրդի քվեի մեծամասնությունը, ապա պարտավոր է ճանաչել Արցախի անկախությունը: Գեղամյանի համար Արցախի անկախության ճանաչման գլխավոր գրավականը օրինական իշխանությունն է:
Իսկ ահա Ռոբերտ Քոչարյանի և Սերժ Սարգսյանի առջև Գեղամյանը նման պահանջներ չի դրել: Բայց չէ՞ որ այդ երկուսն էլ էին «ստացել» ժողովրդի ձայների մեծամասնությունը: Ստացվում է, որ Գեղամյանը չի արել նման բան, քանի որ երկուսին էլ համարում է ոչ լեգիտիմ, ապօրինի, կեղծիքներով ընտրված ղեկավարներ, որոնցից Արցախի անկախություն ակնկալելն անիմաստ է:
Ինչպես ասում են՝ պատից կախված դհոլն էլ է տարին մեկ դմփդմփում: