Ցանկացած ազգային խոհանոց ձվածեղ ունի, միայն թե ամեն երկրում այս հասարակ ուտեստը յուրահատուկ ձևով են պատրաստում: Վրաստանում, օրինակ, ձվածեղը Չիրբուլի անունն ունի ու անպայման իր բաղադրիչների մեջ ներառում է վրացական ուտեստներին հատուկ համեմն ու ընկույզը: Չիրբուլիի մեջ շատ է նաև լոլիկը, որը ձվածեղին հյութեղություն է հաղորդում:
Բաղադրիչները
2 բաժնի համար
- 5 հատ ձու
- 4 հատ լոլիկ
- 1 հատ գլուխ սոխ
- 1 բուռ ընկույզ
- 4-5 պճեղ սխտոր
- 1 ճ.գ. տոմատի մածուկ
- 2 ճ.գ. բուսական յուղ
- 10 գ կարագ
- 3 ճյուղ կանաչ սոխ
- կանաչի (համեմ, սամիթ, մաղադանոս՝ ըստ ճաշակի)
- աղ
- 1/2 բաժակ ջուր
Պատրաստման եղանակը
- Մանր կտրատեք մաքրած գլուխ սոխը, սխտորն ու ընկույզը:
- Լոլիկը խորանարդաձև կտրատեք: Կեղևից մաքրել պետք չէ:
- Մանր կտրատեք կանաչին:
- Թավայի մեջ տաքացրեք բուսական յուղի ու կարագի խառնուրդը, ավելացրեք սոխն ու տապակեք մինչև ոսկեգույն երանգ ստանալը:
- Ավելացրեք սխտորն ու ընկույզը, ևս 1 րոպե տապակեք:
- Ապա ավելացրեք տոմատի մածուկը, հետո՝ կտրտած լոլիկն ու ջուրը: Թողեք եռա, հետո կրակը թուլացրեք և թույլ կրակի վրա 5 րոպե շոգեխաշեք: Աղ արեք:
- Երբ թավայում եփվող զանգվածը միատարր դառնա, հատ-հատ ջարդեք-ավելացրեք ձվերն այնպես, որ դեղնուցն ամբողջական մնա: Թավան կափարիչով ծածկեք, սպասեք մինչև ձվերն էլ պատրաստ լինեն: Լավ կլինի, եթե դեղնուցը մի քիչ թույլ մնա, դրա համար եփել պետք է 5 րոպե:
- Պատրաստի չիրբուլիի վրա կտրտած թարմ կանաչի լցրեք: Մատուցեք տաք վիճակում, հենց թավայով: