Տիպիկ իսպանական խմիչք լինելով հանդերձ՝ սանգրիան ծնունդով Պորտուգալիայից է, իսկ անվանումը պորտուգալերեն sangre՝ արյուն բառից է: Ըստ ավանդույթի՝ սանգրիան կարմիր գինուց են պատրաստում, բայց դեռ հնուց հայտնի են նրա «սպիտակ տարբերակները», որոնցից մեկն էլ կներկայացնենք ստորև:
Բաղադրիչները
4-6 բաժնի համար
- 1 շիշ կամ 750 մլ սպիտակ, փրփրուն գինի
- 100 մլ բաց գույնի ռոմ
- 200 գ սեխի կամ ձմերուկի միջուկ
- 1 ոչ մեծ, կանաչ խնձոր
- 1 փոքր ճութ խաղող
- 1 լայմ
- 2-3 ճյուղ անանուխ
- 2-3 ճ.գ. շագանակագույն մանր շաքարավազ
- 1/2-1 բաժակ գազավորված հանքային ջուր
- սառույց
Պատրաստման եղանակը
- Սեխը կամ ձմերուկը փոքր քառակուսիների ձևով կտրատեք, կտերը հեռացրեք, խաղողը կիսեք, եթե կորիզներ ունի, հեռացրեք:
- Խնձորը բարակ շերտերով կտրատեք: Լայմը լավ լվացեք, բարակ օղակների ձևով կտրատեք:
- Անանուխը, շաքարավազն ու լայմը բաժակի մեջ ճզմեք, վրան լցրեք ռոմը, խառնեք, ապա խառնուրդը լցրեք մեծ սափորի մեջ, ավելացրեք կտրտած միրգը: Խառնեք, վրան լցրեք գազավորված ջուրը: Սափորը 2-3 ժամով տեղադրեք սառնարանում, բայց կարող եք նաև միանգամից մատուցել:
- Մատուցելուց առաջ ավելացրեք գինին, սառույցը ու միանգամից լցրեք բաժակների մեջ:
Խորհուրդ: Սպիտակ գինին կարող եք ընտրել ըստ ճաշակի՝ չոր, կիսաչոր կամ կիսաքաղցր: Եթե կիսաքաղցր գինի եք ընտրել, շաքարավազ կարող եք չօգտագործել: Մրգերի ցանկն էլ կարող եք համալրել՝ ըստ ճաշակի: Այսպես օրինակ՝ կարող եք դեղձ, ծիրան, արքայանարինջ, կիտրոն, տանձ կամ դեղին սալոր ավելացնել: