ԱԺ ՔՊ խմբակցության պատգամավոր Լուսինե Բադալյանը՝ անդրադառնալով ԱԺ նախագահի համար ձեռք բերված նոր BMW մակնիշի ծառայողական ավտոմեքենայի շուրջ քննարկումներին, ասել է. «Ալեն Սիմոնյանն այդ մեքենան տուն չի տանելու, դա ԱԺ-ի համար է»:
«ՉԻ». Դե բա շուտ ասա, հազիվ սիրտներս տեղն ընկավ: Մենք էլ մտածում էինք, որ Ալեն Սիմոնյանն այդ BMW-ն իր համար է առել, որ հետո տուն տանի: Փաստորեն, չկա նման բան: Մի տեսակ նույնիսկ վատ ենք զգում, որ թեման այսքան շահարկել ենք: Լավ բան չստացվեց:
Բայց մի բան պետք է հիշեցնենք. Պենտագոնից հետո աշխարհի ամենամեծ վարչական շենքը Ռումինիայի ներկայիս խորհրդարանի շենքն է: 1984-ին Ռումինիայի ղեկավար Նիկոլաե Չաուշեսկուն որոշում է Բուխարեստում մի հատ թույն շենք սարքել, որը պետք է ցույց տար երկրի հզորությունը: Լոպազի մեկը: 350 հազար քմ ընդհանուր տարածքով մի ահռելի բան պիտի լիներ: Երբ Նիկոլաեին հարցնում են, թե ինչիդ է պետք այսքան ծախսը՝ մի շենքի համար, ասում է՝ ես հո իմ համա՞ր չեմ սարքում, այլ իմ երկրի ու սերունդների համար:
Բայց շինարարությունն այնքան թանկ է նստում երկրի բյուջեի վրա, որ դեռ չավարտած, Ռումինիայի տնտեսությունը փլուզվում է, Չաուշեսկուն էլ զրկվում է իշխանությունից և ոչ միայն իշխանությունից*: Խեղճ մարդն այդպես էլ չվայելեց իր երազանքը:
* Բոլոր համընկնումները պատահական բնույթ են կրում: