Երեկ ՀՔԾ-ն ծավալուն հաղորդագրություն էր տարածել ՀՀ նախկին ոստիկանապետ Ալիկ Սարգսյանի մեղադրանքի վերաբերյալ, որտեղ նշվում էր նաև Գևորգ Կոստանյանի և նախկին փոխոստիկանապետ հանգուցյալ Գևորգ Մհերյանի անունները, ըստ ՀՔԾ-ի, ոստիկանությունում կեղծվել են մարտի 1-ի դեպքերին վերաբերող մի շարք փաստաթղթեր:
«Հրապարակ»-ի հարցին, թե ինչպե՞ս է վերաբերվում իրեն առաջադրված մեղադրանքին, նախկին ոստիկանապետ Ալիկ Սարգսյանը պատասխանել է, որ համարյա հումորով, որ լուրջ բան չկա, անփութություն՝ անհեթեթ հոդվածներով:
«ՉԻ». Մարդը ի՞նչ որակներով օժտված պիտի լինի, որ ծանրագույն մեղադրանքին հումորով վերաբերվի և լուրջ չհամարի: Իսկ ահա Գևորգ Կոստանյանն էլ երեկ մի քանի լրատվամիջոցներով մոտավորապես այսպիսի հայտարարություն էր տարածել, որ մամուլից է իմացել, որ ինքն ու Գևորգ Մհերյանը մեղադրվում են ոստիկանության պետին ինչ-որ ցուցումներ ու հանձնարարականներ տալու մեջ, ինչն, ի դեպ, բացարձակ հերքում է հենց այդ մտացածին ցուցումների և հանձնարարականների հասցեատեր Ալիկ Սարգսյանը: Միայն այսքանը բավարար է արձանագրելու, որ իր և Գևորգ Մհերյանի անվան հետ կապվող մեղադրանքներում առողջ բանականությունն ու իրավական հիմքը բացակայում են:
Դե ինչ, կարկառուն իրավաբանի համար միայն այն, որ մեկ այլ մեղադրյալ փաստաթուղթ կեղծելը լուրջ բան չի համարում և հումորով է վերաբերվում, դա արդեն բավարար է, որ հայտարարի, թե իրավական և առողջ բանականության հիմքը բացակայում է: Ինչ լավ ա չէ՞:
Իսկ Գևորգ Մհերյանը վաղուց արդեն հանգուցյալ է, դեռ 2009-ի փետրվարի 3-ին իր տան մուտքի մոտ դիմահար կրակոցներով է սպանվել: Օրերս էլ ոստիկանության նախնական վարկածով ինքնասպան եղավ նաև նախկին ոստիկանապետ Հայկ Հարությունյանը, որը նույնպես մարտի մեկի գործով առանցքային դերակատարություն էր ունեցել:
Հուսանք, որ մարտի մեկի գործով մնացած վկաները ողջ ու առողջ կմնան, Գևորգ Կոստանյանն էլ արտերկրից կվերադառնա և կբացահայտվի ողջ ճշմարտությունը և սպանդի կազմակերպիչները կստանան արժանի պատիժ: