ՔՊ-ականները կասկածներ ունեն, որ անցած շաբաթ-կիրակի օրերին իրենցից շատերի հեռախոսներում հայտնի «Պեգասուս» գաղտնալսման ծրագիրն են «նստեցրել»։ Այս մասին տեղեկացրել է «Հրապարակ» թերթը՝ նշելով, որ ՔՊ իրենց աղբյուրը չի բացառել, որ դա պայմանավորված է ՔՊ վարչության ընտրությունների կեղծիքներով։ Համաձայն հրապարակման՝ Նիկոլ Փաշինյանի անվստահությունը թիմի հանդեպ էլ ավելի է խորացել, և նա որոշել է «կոնտրոլի» տակ պահել շատերին։ Իր հերթին «Ժողովուրդ» օրաթերթը գրել էր, որ իրավապահները առգրավել են ՔՊ ընտրությունները վերահսկող տեսանկարահանման խցիկները, որպեսզի պարզեն, թե ինչ է կատարվել։
ՔՊ ներսում կատարվածը ընդամենը առիթ է, որպեսզի Փաշինյանը սկսի գաղտնալսել իր այն կուսակիցներին, որոնց հետ լուռ հակամարտության մեջ է։ Սա՝ իմիջիայլոց։ Ինչ վերաբերում է ՔՊ ներսում կատարվողին, ապա կուսակցության մեր աղբյուրներն էլ իրենց հերթին փոխանցում են, որ ի սկզբանե Փաշինյանը որոշում է ունեցել վարչության կազմից դուրս թողնել Արսեն Թորոսյանին։ Նրա դեմ ոչ միայն կուսակցության ներսում է արշավ կազմակերպվել, այլև հակամարտությունը տեղափոխվել է «բաց դաշտ»՝ անբարենպաստ հրապարակումների և ինֆորմացիոն արտահոսքերի տեսքով։ Սակայն Թորոսյանը կարողացել է ինչ-ինչ ձևերով ազդել Փաշինյանի որոշման վրա։ Չի բացառվում, որ նա կոմպրոմատի լեզուն է բանեցրել կամ էլ նրա միջազգային «գործընկերներն» են ՔՊ ղեկավարին հասկացրել, որ հրաժարվի Թորոսյանին վարչության կազմից դուրս մղելու որոշումից։ Փաշինյանը ելք չի ունեցել և ստեղծված իրավիճակում հիմա էլ փորձում է տպավորություն թողնել, թե իր կուսակցության ներսում էլ թափանցիկության և լեգիտիմ ընտրության ժողովրդավարական սկզբունքներն է պաշտպանում։
Ինչ վերաբերում է գաղտնալսման մասին խոսակցություններին և դրանից ահաբեկվողներին, ապա ամեն ինչ օրինաչափ է։ Իրենք են համաձայնել քծնել, չքննադատել, մշտապես ծափահարել առաջնորդին, մի խոսքով՝ զիջել իրենց բոլոր իրավունքները՝ հանուն փողկապավորի կարգավիճակի ու դրա տված բարիքների։
Գոհար Վեզիրյան