Իշխանական բլոգերի համբավ ունեցող Մովսես Հարությունյանը ֆեյսբուքի իր էջում տեղադրել է Գևորգ Փարսյանի խոսքը և գրել. «Շատ ողջունելի հայտարարություն Գևորգ Փարսյանի կողմից։
«Դավաճան-հողատու» դիսկուրսը լավ տեղ չի տանելու։ Պետք է բոլորով համատեղ աշխատել ու դիմակայել երկրի առջև ծառացած բազում մարտահրավերներին։
Շնորհավո՜ր ընտրված բոլոր համայնքապետերին»։
«ՉԻ». Հիշեցնենք՝ երեկ տարած հաղթանակից հետո Գևորգ Փարսյանը հայտարարեց, որ հունիսի 20-ին Նիկոլ Փաշինյանը հաղթել է, և համագործակցությունն անխուսափելի է:
Ինչ խոսք, ջախջախիչ պարտությունից հետո իշխանականների համար այս հայտարարությունը սփոփանք է: Բայց հարցեր, այնուամենայնիվ, առաջանում են:
Քարոզարշավի ժամանակ ՔՊ թեկնածու Դանիելյանը հայտարարում էր, որ Կապանում այլևս ալբանացին չի որոշելու, ալբանացին չի ղեկավարելու քաղաքը: Ի դեպ, թեկնածուն սովորական թեկնածու չէր, նա իշխանական խմբակցության պատգամավոր է:
Հիմա իշխանությունը պետք է կողմնորոշվի՝ սրբագրե՞լ սեփական պատգամավորի խոսքերը, թե՞ դրանք որևէ նշանակություն չունեցող հայտարարություններ են:
Այս տրամաբանությամբ՝ վաղը եթե որևէ ադրբեջանցի հաղթի որևէ հայաստանյան ՏԻՄ ընտրություններում, ապա իշխանությունների համար խնդիր չի լինի, եթե ադրբեջանցին ընդունի, որ Նիկոլ Փաշինյանը հունիսի 20-ին հաղթել է և իրավունք ունի ղեկավարելու Երևանի մերձակայքը:
Հ.Գ. Շնորհավորելուց առաջ հիշեք, որ ձեր թիմակիցը հաղթողին անվանել է ալբանացի: Ինչպե՞ս եք պատրաստվում համագործակցել ալբանացու հետ: Թեպետ դուք ճկուն եք, կհամագործակցեք, կարևորը՝ Երևանի ձեր աշխատասենյակներին ոչինչ չսպառնա: