ՀՀ նախկին վարչապետ, ԱԺ ՀՀԿ խմբակցության նախկին պատգամավոր Խոսրով Հարությունյանն իր ֆեյսբուքյան էջում գրել է. «Երեկ լրահոսում աչքովս ընկավ մի տեղեկատվություն: Օրեր առաջ Վարչապետ Փաշինյանը իր ֆեյսբուքյան էջում գրառումով ավետել էր այն մասին, որ Հայաստանին հաջողվել է 2019 թվականի արդյունքներով՝ 1 շնչին ընկնող ՀՆԱ-ի ցուցանիշով անցնել Վրաստանին: Ես ծանոթացա նաև այս տեղեկատվությանը վարչապետ Բագրատյանի վիճակագրական տվյալներով փաստարկված արձագանքին, ինչն անշուշտ համոզիչ էր:
Համաձայնեք, որ պետության կառավարումը ավելի լուրջ վերաբերմունքի է արժանի»:
«ՉԻ». Ինչ-ինչ, բայց Խոսրով Հարությունյանի հետ համաձայն ենք. պետության կառավարումը ավելի լուրջ վերաբերմունքի է արժանի: Խնդիրն այն է, որ սա ասում է մի մարդ, որը պետության կառավարման հետ անհամատեղելի է:
Ընդամենը 6 ամիս է Խոսրով Հարությունյանը եղել ՀՀ վարչապետ, և այդ ընթացքում Հայաստանն ու Արցախը հայտնվեցին կործանման եզրին: Իր պաշտոնավարման ընթացքում ամենախոշոր պարտությունները գրանցվեցին արցախյան պատերազմում, կորցրեցինք Շահումյանի շրջանը, Մարտակերտի շրջանի մեծ մասն ու հակառակորդը Ստեփանակերտի մատույցներում էր:
Ու հենց Խոսրով Հարությունյանի օրոք Հայաստանի տնտեսությունը փլուզվեց. իսկապես Հայաստանն ու Արցախը կարող էին վերանալ քարտեզի վրայից, եթե մի քիչ էլ մնար վարչապետի պաշտոնին: Ու այդ ամենը պարզ բացատրություն ուներ. պետության կառավարումը շատ ավելի լուրջ քաղաքական, մարդկային և կամային հատկանիշներ էր պահանջում, որոնք Խոսրով Հարությունյանը չուներ: Ու նրա հետագա գործունեությունն էլ դրա վառ ապացույցն էր, երբ տարին մի անգամ ճամբար էր փոխում՝ սպասարկելով օրվա իշխանություններին:
Այս ամենը, ինչ գրեցինք Խոսրով Հարությունյանի մասին, գիտե՞ք, թե ով էր ժամանակին ասում. Հրանտ Բագրատյանը: Այն Բագրատյանը, որի խոսքերը Խոսրով Հարությունյանը համոզիչ է համարում: Մենք էլ ենք գտնում, որ Խոսրով Մելիքիչի մասին Բագրատյանի որակումները համոզիչ էին ու մնում են այդպիսին: