Այս աղանդերի համար նախատեսված կաթնաշոռը կարող եք ինչպես գնել, այնպես էլ պատրաստել տնային պայմաններում: Դրա համար 3 լիտր տաք կաթին 1 ճ.գ. թթվասեր ավելացրեք, խառնեք: Կաթը 12 ժամով թողեք սենյակային ջերմաստիճանի պայմաններում: Կաթնաշոռային կաթը հասցրեք եռման աստիճանի, հետո հովացրեք՝ կաթնաշոռը շիճուկից զատելու համար: Այս ձևով պատրաստված կաթնաշոռը փափուկ ու նրբահամ կլինի:
Բաղադրիչները
4 բաժնի համար
- 250 գ կաթնաշոռ
- 150 գ հատապտուղներ՝ ըստ ճաշակի
- 1 ճ.գ. ժելատին
- 2 թ.գ. կիտրոնի հյութ
- 5 ճ.գ. հանքային ջուր
- 3 ճ.գ. կաթ
- 2 ճ.գ. թթվասեր
- 1 ճ.գ. շաքարավազ
- 1/4 թ.գ. աղ
Պատրաստման եղանակը
- Ժելատինը թրջեք վեցապատիկ ավել սառը ջրի մեջ և թողեք փքվի: Ավելորդ հեղուկը հեռացրեք:
- Քերած կաթնաշոռը խառնեք կիտրոնի հյութի, հանքային ջրի, շաքարավազի, աղի հետ ու հարեք:
- Տաք կաթը խառնեք ժելատինի հետ, կրակի վրա հասցրեք եռման աստիճանի, ապա հովացրեք, խառնեք կաթնաշոռի զանգվածի հետ:
- Թթվասերը հարեք, խառնեք կաթնաշոռա-թթվասերային զանգվածի հետ: Ստացված խառնուրդը հատապտուղների հետ լցրեք տարայի մեջ: 3 ժամով սառեցրեք: Մի քիչ հատապտուղ թողեք զարդարելու համար:
- Մատուցելիս տարաները մի քանի վայրկյանով մտցրեք եռացող ջրի մեջ: Աղանդերը տեղադրեք ափսեի մեջ, զարդարեք հատապտուղներով ու անանուխի տերևներով: Ցանկության դեպքում վրան կտրտած ընկուզեղեն ցանեք: