Սա Զատկի ավանդական հյուրասիրություն է. ռիկոտայով կամ կովի կաթից պատրաստված այլ պանրով լցոնած փոքրիկ զամբյուղիկներ: Այս զամբյուղիկները տարածված են կղզու ողջ տարածքում, և Սարդինիայի տարբեր հատվածներում դրանք տարբեր կերպ են անվանում: Պարդուլասը Սարդինիայում պետք է Զատկի սեղանի պարտադիր զարդը լինի ու նվեր դառնա բոլոր նրանց համար, ովքեր կորոշեն հյուր գալ:
Սկսեք պատրաստել մատուցելուց 4 ժամ առաջ:
Բաղադրիչները
6-8 բաժնի համար
- 500 գ ալյուր
- 80 գ հալեցրած խոզի ճարպ
- աղ
Միջուկի համար
- 500 գ ռիկոտա պանիր
- 150 գ ալյուր
- 1 բաժակ շաքարավազ
- 2 ձվի դեղնուց
- 1 ձու
- 1 միջին չափի նարնջի կեղև
- մի պտղունց աղացած քրքում
- 1 թ.գ. փխրեցուցիչ
Պատրաստման եղանակը
- Խմորի համար ալյուրից բլուր արեք, կենտրոնում անցք բացեք, մեջը լցրեք աղը և այնքան տաք ջուր, որպեսզի էլաստիկ, հարթ խմոր հունցեք: Աստիճանաբար ավելացրեք հալեցրած ճարպը: Խմորից գունդ արեք և 3 ժամով տեղադրեք սառնարանում:
- Միջուկի համար նարնջի կեղևը մանր կտրատեք: Իրար հետ խառնեք ռիկոտան, նարնջի կեղևը, շաքարավազը, դեղնուցը, ձուն և քրքումը: Ալյուրը խառնեք փխրեցուցիչի հետ, ավելացրեք ռիկոտային:
- Խմորը հանեք սառնարանից, շատ բարակ շերտով բացեք և մոտ 10 սմ տրամագծով շրջանակներ առանձնացրեք: Յուրաքանչյուր շրջանակի կենտրոնում թեյի գդալով միջուկ լցրեք:
- Խմորի ծայրերը բարձրացրեք և այնպես ամրացրեք, որպեսզի զամբյուղիկներ ստացվեն:
- Պարդուլասը 15 րոպեով տեղադրեք 160 աստիճան ցելսիուս տաքության ջեռոցի մեջ:
Խորհուրդ: Երբ պարդուլասը դեռ տաք է, կարելի է վրան ջուր քսել և շաքարի փոշի ցանել: Ոմանք գերադասում են պարդուլասը մեղրով ջնարակել: Կարելի է նաև աղի պարդուլաս պատրաստել: Այդ դեպքում միջուկի համար հարկավոր է վերցնել ռիկոտա պանիր, մանր կտրտած մաղադանոս, ալյուր, քրքում և աղ:
«Չորրորդ իշխանություն», թիվ 15, 2021