...

Հեշտ ու համեղ. Իշխանը՝ բուրումնավետ չորահացով

Հեշտ ու համեղ. Իշխանը՝ բուրումնավետ չորահացով

Հին ժամանակներում իտալական Ֆրիուլի-Վենետիկ-Ջուլիա շրջանում կովերին կանայք ու երեխաներն էին արածեցնում: Տղամարդիկ ավելի դժվար գործով էին զբաղվում (արոտի տանելը հեշտ աշխատանք էր համարվում, համարյա՝ հանգիստ): Մինչ կենդանիներն արածում էին, երիտասարդությունը զվարճանում էր, իսկ կանայք գործում էին կամ կարում: Լինում էր նաև, որ երկուսն էլ կովերին թողնում էին արածելու և քայլում դեպի գետը՝ ձուկ բռնելու: Ամռանը գետերը սովորաբար ծանծաղանում էին, և ձեռքով ձուկ բռնելը հեշտ գործ էր դառնում: Չնայած ծովին մոտիկ լինելուն, տեղացիների համար մինչ օրս էլ սիրելի ձուկը գետի իշխանն է:

Բաղադրիչները
2 բաժնի համար

  • 2 միջին չափի իշխան
  • 200 գ սառեցրած կամ պահածոյացված կանաչ ոլոռ
  • ծնեբեկի 3 ընձյուղ
  • կես գլուխ սոխ
  • 1 միջին չափի դդմիկ
  • 1 միջին չափի գազար
  • 1 խուրձ նեխուր
  • 100 գ չորահաց
  • 1 ճյուղ մաղադանոս
  • ռեհանի 6 տերև
  • կես պճեղ սխտոր
  • մի պտղունց խնկածաղիկ
  • 1 դափնու տերև
  • ձիթապտղի ձեթ
  • աղ, աղացած սև պղպեղ

Պատրաստման եղանակը

  1. Մաղադանոսը, ռեհանն ու սխտորը շատ մանր կտրատեք: Խնկածաղիկն ու դափնու տերևը փշուրների վերածեք: Խնկածաղիկը, դափնու տերևը, մաղադանոսը, ռեհանն ու սխտորը խառնեք չորահացի հետ:
  2. Ձուկը մաքրեք, միսն առանձնացրեք փշերից: Տապակը պատեք ձեթով, ձկները մաշկով դեպի ներքև տեղադրեք տապակի մեջ, վրան լցրեք բուրումնավետ չորահացը: Տապակը 20 րոպեով տեղադրեք 220 աստիճան ցելսիուս տաքության ջեռոցում:
  3. Ծնեբեկի կոշտ ծայրերը հեռացրեք: Գազարը, սոխը, նեխուրը, դդմիկն ու ծնեբեկը մանր քառակուսիների ձևով կտրատեք: Կտրտած բանջարեղենը լցրեք 1-2 ճ.գ. ձեթով թավայի մեջ, ավելացրեք ոլոռն ու միջին ուժգնության կրակի վրա 5 րոպե տապակեք: Ավելի երկար տապակելու կարիք չկա, բանջարեղենը չպետք է սևանա:
  4. Պատրաստի ձուկը տեղադրեք մեծ ափսեի մեջ և վրան լցրեք տապակած բանջարեղենը:

Մատուցեք տաք վիճակում:


 

ՎԱՐԿԱՆԻՇ

   604 ԴԻՏՈՒՄ

Տարածեք

ՆՄԱՆԱՏԻՊ ՆՅՈՒԹԵՐ
Դեպի ՎԵՐ