Վատիկանում ՀՀ նախկին դեսպան Միքայել Մինասյանը ֆեյսբուքյան իր էջում անդրադառնալով վարչապետի թեկնածու Վազգեն Մանուկյանի գործունեությանը, նշել է. «Իննսունականների սկզբի վարչապետի «դասախոսություններով» պետականության կրթությունը սկսած սերունդը հիմա շատ բան է այլևս հասկանում ու կարողանում։ Ու հիմա մենք մեր առաջին «դասախոսի» կողքին ենք, որ Հայրենիքը փորձենք փրկել։
Ձեզ անսպառ ուժ ու համբերություն, պարոն վարչապետ Վազգեն Մանուկյան»:
«ՉԻ». Վերջին շրջանում ուշադրությամբ հետևում էինք Միքայել Մինասյանի գրառումներին: Բավական հետաքրքիր բաներ էր գրում: Մեջը օբյեկտիվություն կար, ուշագրավ փաստեր էր հրապարակում, որոնց իսկությունը կասկած չէր հարուցում, տեքստերի տողատակերում վիշտ, ցավ, դառնություն էինք տեսնում: Ի՞նչ մեղքներս թաքցնենք, մտածում էինք, թե մարդը ինչ-որ բաներ վերաիմաստավորել է, հասկացել է, թե ինչը հանգեցրեց այսպիսի աղետալի հետևանքների, այս ամենի տուտը որտեղից է սկսվում:
Պարզվեց՝ չարաչար սխալվում ենք: Պարզվեց, որ սրանց քաղաքական միտքը սահմանափակվում է Վազգեն Մանուկյանով: Էլ ինչո՞ւ եք պահանջում Նիկոլ Փաշինյանի հրաժարականը: Նիկոլը 2,5 տարի առաջնորդվել է նաև Վազգեն Մանուկյանի կոնսպեկտներով ու գաղափարներով: Ու Վազգեն Մանուկյանը նույնպես պատասխանատու է այս խայտառակ պարտության համար: Մի կողմ թողնենք այն, որ ժամանակին ինքն էլ է մասնակցել ղարաբաղյան հակամարտության կարգավորման գործընթացի վիժեցմանը, ու 20 տարի հանդես է եկել հակամարտությունը չլուծելու դիրքորոշմամբ, որն էլ նաև Նիկոլն է շարունակել:
Պարզապես ներկայացնենք, թե ընդամենը մեկ տարի առաջ Վազգեն Մանուկյանը «Հայ զինվոր» պարբերականին տված հարցազրույցում ինչ է ասել:
«1) Միանշանակ է, որ մենք ունենք ավելի մարտունակ բանակ, քան Ադրբեջանը՝ ի հեճուկս Ադրբեջանի նյութական ռեսուրսների, նավթի, եղբայր երկրի աջակցության և այլն։
2) Ապրիլյան պատերազմում մեր բանակի կործանիչ հակահարվածը տևական ժամանակով հետաձգեց նոր, ավելի լայնածավալ պատերազմի վտանգը:
3) Իր անկախությունը զենքով նվաճած ու 25 տարի պաշտպանած երկիրը չի կարող բանակցային սեղանի շուրջ կորցնել այդ անկախությունը: Այս առումով՝ ժամանակը աշխատում է մեր օգտին»:
Դե հիմա վերցրեք Վազգեն Մանուկյանի այս խոսքերը ու համեմատեք Նիկոլ Փաշինյանի՝ վերջին 2,5 տարում արած հայտարարությունների հետ. մեկը մեկին համընկնում է, որևէ տարբերություն չկա: Ու հիմա անհեռատես Նիկոլ Փաշինյանին փոխես էլ ավելի փորձառու անհեռատես Վազգեն Մանուկյանով, տարբերությունը ո՞րն է լինելու: Այս մարդով ե՞ք հայրենիք փրկելու, եթե մի տարի առաջ Նիկոլի հետ միասին Հայաստանն ու Արցախը տանում էին աղետի ճանապարհով: Հարցը հռետորական է: Հաստատ պատասխան չի լինի: