...

Սոլովյովը որևէ պարտավորություն չունի

Սոլովյովը որևէ պարտավորություն չունի

Այսօր համացանցում բազմաթիվ օգտատերեր խիստ քննադատության էին ենթարկում ռուսաստանցի հեռուստահաղորդավար Վլադիմիր Սոլովյովին, որ վերջինս իր հեղինակային հաղորդման ժամանակ, որը նվիրված էր Արցախում ընթացող պատերազմին, ոչ հայանպաստ տեսակետներ է հայտնել:

«ՉԻ». Զարմանալին այն է, որ ընդամենը երկու օր առաջ բազմաթիվ հայեր գովում էին Սոլովյովին, շնորհակալություն հայտնում, որ նա Արցախի ու Հայաստանի մասին դրական մտքեր է հայտնել:

Ցավոք սրտի, այս հոգեբանությունը բավական խորն է նստած մեր հանրության գիտակցության մեջ, երբ պատերազմի վերաբերյալ պատկերացումները դրսի արձագանքներով ու տեսակետներով են կազմում: Եթե լավ են խոսում, ուրեմն՝ հաստատ կօգնեն, կամ ամեն ինչ լավ է, եթե բացասական՝ ուրեմն, ծախված են, կաշառված ու պատվեր են կատարում:

Վլադիմիր Սոլովյովը ռուսական մեդիադաշտի ամենաազդեցիկ և հայտնի ներկայացուցիչներից մեկն է, որը բավական պատրաստված է, ինչ անուն էլ նրան կպցնեն, գրագետ, բայց նա որևէ պարտավորություն չունի Հայաստանի, Արցախի և հայերի մասին միայն մեզ հաճելի մտքեր հայտնել: 

Միգուցե հոգու խորքում նա խիստ զայրացած է թուրքերի վրա, ատում է նրանց, շատ է ցանկանում, որ պատերազմում մենք հաղթենք, բայց նա առաջին հերթին Ռուսաստանի շահերն է պաշտպանում, կամ առաջնորդվում այդ շահերով: Ինչքա՞ն պիտի ասենք, որ ոչ ոք հենց այնպես, մեր սիրուն աչքերի կամ արդարացի պատերազմի համար վտանգի տակ չի դնի իր շահերը: Ուրեմն, խնդիրը մեր մեջ է, ոչ թե՝ Սոլովյովի, մե՛նք պետք է նրան մեզ դաշնակից դարձնենք, ոչ թե նա՝ մեզ: Սա էլ պատերազմի քիչ երևացող ճակատն է, որտեղ նույնպես կենաց-մահու պայքար պետք է մղել: 

Ուրեմն, հանգիստ պետք է թողնել Սոլովյովին, Լարի Քինգին և մնացածներին: Նրանք շարունակելու են ասել այն, ինչ թելադրում է իրենց երկրի շահը:

ՎԱՐԿԱՆԻՇ

   1167 ԴԻՏՈՒՄ

Տարածեք

ՆՄԱՆԱՏԻՊ ՆՅՈՒԹԵՐ
Դեպի ՎԵՐ