«Ազգային անվտանգություն» կուսակցության նախագահ Գառնիկ Իսագուլյանը՝ անդրադառնալով Արցախի Հանրապետության անվտանգության խորհրդի նախկին նախագահ Սամվել Բաբայանի աղմկահարույց հարցազրույցին, որտեղ նա Արցախի կապիտուլյացիայի, Ջաբրայիլի և Շուշիի օպերացիաների ձախողման իր պատճառներն էր նշել, ասել է. «Սամվել Բաբայանը միշտ է օգտագործվել և օգտագործվել է բոլորի կողմից, բայց քանի որ իրեն Ռուսաստանն ու Արցախն արդեն մերժել էին, որոշեց Նիկոլ Փաշինյանի հանձնարարությամբ Աննա Հակոբյանի հետ միասին ծառայել թուրքերին»:
«ՉԻ». Ամեն ինչ պարզ է, հասկանալի: Եթե որևէ գեներալ, հրամանատար այս իշխանությունների դեմ է արտահայտվում, ապա նա արցախյան պատերազմի հերոս է, լեգենդար հրամանատար, ազգի կամ հայրենիքի արժանի զավակ, փրկիչ: Ինչպես օրինակ՝ Սեյրան Օհանյանը կամ Մովսես Հակոբյանը:
Իսկ եթե իշխանությունների դեմ չի արտահայտվում, դե, պարզից էլ պարզ է, որ նա դավաճան է, ծառայում է թուրքերին, գործիք է սրա կամ նրա ձեռքում:
Մանավանդ, եթե նման որակումներ է տալիս «Զուլումը», ո՞նց կարող է նա սխալ բան ասի: Հետո՞ ինչ, որ բոլոր դեպքերում Սամվել Բաբայանը 1990-ականներին արցախյան պատերազմի ամենավառ հրամանատարներից մեկն է եղել, Արցախի հերոս է եղել, գեներալ: Դա որևէ կապ չունի: Օրինակ, եթե հանկարծ Սեյրան Օհանյանն էլ Սամվել Բաբայանի պես մտքեր հայտներ, հաստատ նրան էլ կհամարեին թուրքերին ծառայող:
Ու սրանք այն ուժերն են, որոնք առավոտից երեկո իշխանություններին մեղադրում են հայկական բանակի ակնառու գեներալներին, պատերազմի հերոսներին հալածելու, նրանց ծառայությունները նսեմացնելու մեջ: Իբր իրենք գեներալ ու հրամանատար հարգող ուժեր են: