Արմեն Սարգսյան. Կենդանակերպի նշանը՝ Ամուլսարյան հանքազավր:
Այս համաստեղության տակ ծնվածներին շատ լարված աշխատանքային շաբաթ է սպասվում: Անգամ գրիչի թանաքը կվերջանա:
Երկուշաբթի նամակ կգրեք Իլոն Մասկին՝ խնդրելով շատ արագ տիեզերք ուղարկել և փրկել ՍԴ-ի շուրջ գործընթացներին մասնակից դառնալու հեռանկարից:
Երեքշաբթի կհայտարարեք, որ շատ քիչ լիազորություններ ունեք, բայց քանի որ բարի պապիկ եք, կարող եք եղածով էլ կիսվել չունևորների հետ:
Չորեքշաբթի տհաճ անակնկալ կմատուցի ՀԷՑ-ը: Ամբողջ օրը կհոսանքազրկվի Բաղրամյան 26-ը, և սառնարաններում պահեստավորված պաղպաղակն ու բարբեքյուի միսը կփչանան:
Հինգշաբթի կստորագրեք օրենք, որով հրաժարվում եք ստորագրել այն օրենքները, որոնք ենթակա են պարտադիր ստորագրման:
Ուրբաթ երկակի զգացողություններ կունենաք. Փաշինյանը կրկին կպահանջի ձեր անձնագիրը, իսկ Նաիրա Զոհրաբյանը կհայտարարի, որ վերակենդանացել եք:
Շաբաթ-կիրակի մնացեք տանը, հանգստացեք: Հաճախ մատների վարժություն արեք: Ի վերջո քաղաքական կապիտալին աչքի լույսի պես է պետք վերաբերվել: