Արմեն Սարգսյան. Կենդանակերպի նշանը` Բրիթիշ Փետուր
Այս համաստեղության տակ ծնվածների համար շաբաթը հագեցած կլինի խառը ու անորոշ իրադարձություններով:
Երկուշաբթի օրը Նիկոլ Փաշինյանը Օնիկ Գասպարյանին աշխատանքից ազատելու հրամանագիր կստորագրի. երեկոյան ընդդիմությունը ձեզ կհիշեցնի, որ դուք բրիտանական դրածո եք:
Երեքշաբթի օրը Նիկոլ Փաշինյանի հրամանագիրը հետ կուղարկեք. երեկոյան իշխանությունը ձեզ կհիշեցնի, որ դուք Սերժի դրածոն եք:
Չորեքշաբթի օրը Նիկոլ Փաշինյանը հրամանագիրը նորից ձեզ կուղարկի. երեկոյան Միքայել Մինասյանն իր լայվում կխոստանա բացահայտել ձեր կոռուպցիոն անցյալը:
Հինգշաբթի օրը հրամանագիրը հետ կուղարկեք. Միքայել Մինասյանն իր լայվում կբացահայտի Նիկոլ Փաշինյանի կոռուպցիոն անցյալը:
Ուրբաթ օրը առավոտյան կհրաժարվեք հանդիպել Նիկոլ Փաշինյանի հետ, որը ձեզ կմեղադրի Շուշին հանձնելու մեջ: Երեկոյան կհրաժարվեք հանդիպել Վազգեն Մանուկյանի հետ, որը ձեզ կմեղադրի Շուշին հանձնելու մեջ:
Շաբաթ և կիրակի ուսումնասիրեք առաջիկա շաբաթվա Երևան-Լոնդոն չվերթների ժամանակացույցը. աստղերը միայն հուշում են, բայց կրակից չեն հանում:
«Չորրորդ իշխանություն», թիվ 8, 2021