ՀԱՊԿ խորհրդարանական վեհաժողովի խորհրդի նիստից հետո ԱԺ ՔՊ խմբակցության պատգամավոր Գուրգեն Արսենյանը, պատասխանելով հարցին, թե ադրբեջանական զորքերի՝ ՀՀ տարածք ներխուժման հարցը քննարկվե՞լ է, թե՞ ոչ, հայտարարել է․ «Հարցը պետք է ուղղել գործադիր իշխանությանը, որովհետև ես այդ նամակագրությանը չեմ տիրապետում։ Դա գաղտնի նամակագրություն է։ Ես այդ ժամանակ դեռ խմբակցության անդամ չէի»։ Ի դեպ, լրագրողները նկատել են, որ մեկ տարի է անցել այդ ներխուժումից, սակայն հանրությունը մինչ այսօր այդպես էլ հստակ չգիտե՝ ՀՀ-ն այդ հարցով պաշտոնական նամակ հղե՞լ էր ՀԱՊԿ-ին, թե՞ ոչ։
Դե, Արսենյանը որտեղի՞ց իմանա։ Անգամ, եթե խմբակցության անդամ էլ լիներ, մեկ է՝ չէր իմանալու, ճիշտ այնպես, ինչպես չգիտեն ՔՊ-ականները։ Չգիտեն, բայց իրենց ասած «դուխն» էլ չունեն, որ կուսակցության վարչության նիստերին կամ հավաքներին մի հատ իրենց սրտի վարչապետին հարցնեն, թե ի՞նչ է արել ՀՀ-ն վերոնշյալ փաստի առիթով։ Վախենում են այս հարցը բարձրացնել, որովհետև հնարավոր է՝ Փաշինյանի տրամադրությունը հարցից միանգամից ընկնի ու հարց տվողը հայտնվի շատ անհարմար վիճակում։ Ինչ վերաբերում է Արսենյանին, ապա տարբերություն չկա․ եթե նույնիսկ այդ ընթացքում խմբակցության անդամ լիներ, մեկ է՝ ծպտուն չէր հանելու։ Հազիվ դիրքավորվել է իշխանության մեջ, բա արժե՞ էդ հարմար դիրքը փչացնել անհարմար հարցադրումներով։
Գոհար Վեզիրյան