Հետթավշյա այս ժամանակահատվածում մերժվածները շատ են շահարկում դատական արդարադատության թեման: Վերհիշենք նախկինների դատավարական մի դրվագ, ու «խնդաս, թե լաս» յուրովի որոշենք:
«ՉԻ», N 160, փետրվարի 14, 2009 թ.
ՀՀ գլխավոր դատախազի տեղակալ Գագիկ Ջհանգիրյանի գործի դատաքննության ընթացքում երեկ հարցաքննվեց Ոստիկանության կազմակերպված հանցավորության դեմ պայքարի 6-րդ գլխավոր վարչության 3-րդ վարչության պետ, գնդապետ Սամվել Ասատրյանը` Մետաքսի Սամոն, ով փաստացի ապացուցեց, որ Գագիկ Ջհանգիրյանին ձերբակալելու իրավունք իրենք թեև չեն ունեցել, բայց բերման են ենթարկել, քանի որ հրահանգն այդպիսին է եղել:
Երեկվա նիստը սկսվեց դատավորի ինքնաբացարկի միջնորդության մերժումից: Փաստորեն Ժորա Վարդանյանը չօգտվեց իրեն ընձեռված վերջին հնարավորությունից ու չհրաժարվեց Ջհանգիրյանին դատելու իր գործառույթից: Գագիկ Ջհանգիրյանն էլ ասաց, որ ինքը հենց այդպիսի պատասխան էլ ակնկալում էր, բայց քանի որ մտադիր է գործը հասցնել մինչև Եվրոդատարան, ուստի ստիպված է ներպետական բոլոր ատյանները սպառել: Պաշտպանական կողմի հայտարարություններից հետո դատավորը ներս հրավիրեց գործով անցնող վերջին վկային` 6-րդ գլխավոր վարչության 3-րդ վարչության պետ Սամվել Ասատրյանին, ում արված ակնարկներից հասկանալի դարձավ, որ նախորդ օրը հանդիպել էր Գագիկ Ջհանգիրյանին` բանտում: Հիշեցնենք նաև, որ այս վկան երկար ժամանակ վախենում էր գալ դատարան` Ջհանգիրյանի ձեռքը չընկնելու համար: Բայց երեկ նրա նկատմամբ գլխավոր դատախազի տեղակալը բավական լավ էր տրամադրված ու նույնիսկ հայտարարեց, որ «Միակ մարդկային մարդն էր այդ ամբողջ 6-րդ վարչության շենքում, միակ պաշտոնյան, որ գոնե ռիսկ ունեցավ եկավ հարցրեց, գնաց եղբորս առողջականով հետաքրքրվեց: Ասում եմ, որ ժողովուրդն էլ իմանա, որ չճնշեք իմ վկային: Նա ձեւով մերն է, բովանդակությամբ` ձերը»,- սկզբում ասաց Ջհանգիրյանը` հավելելով, թե «Սմբատը բարեւում էր, Սամվե՛լ»:
Այսպիսի քաղցր մթնոլորտում սկսված վկայի հարցաքննությունը, սակայն, նույնպիսի վերջաբան չունեցավ` գոնե Սամոյի համար, քանի որ նա ևս, ինչպես 6-ի մյուս աշխատակիցները, ապացուցեց, որ այդ կառույցն ապօրինություն է գործում: և այսպես, ըստ Ասատրյանի, «փետրվարի 23-ին մեր վարչությունում երեկոյան կողմ, երբ բոլորս վարչությունում էինք, Կարեն Բաբակեխյանը (6-ի պետի տեղակալը) կապնվեց ինձ հետ և ասեց, որ աշխատակիցների կողմից ստացված տեղեկություն կա և պահանջեց օպերատիվ խումբ պիտի կազմեմ, որը պետք է գնար Արգավանդի խաչմերուկ: Էջմիածնից մեքենաներ էին գալու, որոնց մեջ եղած մարդիկ ապօրինի զինված են: Ես էլ ասեցի իմ վարչության տղաներին, որ իջնեն Բաբակեխյանի մոտ: Գիտեմ, որ պետք է մասնակցեին նաև Հատուկ նշանակության ջոկատի տղաները»:
Փաստաբան Լուսինե Սահակյան - Բաբակեխյանը դատարանում ասաց, որ ձեր վարչության աշխատակցի միջոցով է նա ստացել այդ ինֆորմացիան: Մենք քաջատեղյակ ենք ձեր վարչության աշխատանքներին և գիտենք, որ դուք այդ ինֆորմացիային պետք է տեղեկանայիք ուղղակի ձեր աշխատակցից, այլ ոչ թե պարոն Բաբակեխյանից:
Սամվել Ասատրյան - Եթե դուք լավ ինֆորմացված եք 6-րդ վարչությունից, մի բան էլ ասեմ, որ եթե հրատապ ինֆորմացիա կա, եթե օպերլիազորը զեկուցի դրա մասին իր բաժնի պետի տեղակալին, բաժնի պետի տեղակալը` իր բաժնի պետին, բաժնի պետը` վարչության պետի տեղակալին, վարչության պետի տեղակալն էլ` պետին... արդեն սենց գնում է: Հրատապ ինֆորմացիա ա եղել: Ըտենց դեպքեր էնքա~ն ա եղել, որ մտել են հենց վարչության առաջին տեղակալին են զեկուցել:
Սահակյան - Ինչո՞ւ գլխավոր վարչության պետին չեն զեկուցել, այլ տեղակալին:
Ասատրյան - Ի՞նչ կա, խի՞: Զեկուցել են պարոն Բաբակեխյանին, վատ բան չեմ տեսնում:
Սահակյան - Այսինքն` ձեր աշխատակիցներն իրենք են որոշո՞ւմ, թե որն է հրատապ և իր անմիջական ղեկավարը կարող է չիմանալ այդ մասին:
Ասատրյան - Ես վատ բան չեմ գտնում: Զեկուցվել է Բաբակեխյանին, նա էլ խմբին հրահանգել է, որ դուրս գան օպերացիայի:
Սահակյան - Տեղեկությունը, որ ստացել եք, թե զինված մարդիկ կան, ինչպե՞ս եք իրացրել:
Ասատրյան - Խոսքի օրինակ ռեալիզացնելու մոմենտով օպերլիազորը տերիտորիայով ման ա գալիս, տենում ա հանցագործություն ա կատարվում:
Սահակյան - Խոսքը դրա մասին չէ: Որտե՞ղ եք գրանցում այդ ինֆորմացիան, ի՞նչ եք անում։
Ասատրյան - Եթե մեկի վրա գողություն ա կատարվում, եթե ուզում ենք խորացնել, նրա նկատմամբ կազմում ենք օպերատիվ գործ, նախնական ստուգման` ստացված ինֆորմացիան ավելի խորացնելու, ավելի խորը տեղեկություններ ձեռք բերելու համար:
Սահակյան - Ո՞նց իրացրեցիք Ջհանգիրյանին վերաբերող ինֆորմացիան:
Ասատրյան -Ինֆորմացիան ստացվել ա, խումբ ա ստեղծվել, որ գնա, տեղում ստուգվի:
Սահակյան - Օպերատիվ գործ կազմվե՞լ է:
Ասատրյան - Չէ, օպերատիվ գործ, բան չի կազմվել:
Սահակյան - Ո՞ր օրենքով եք ղեկավարվում, երբ մի դեպքում օպերատիվ գործ կազմում եք, իսկ մյուս դեպքում` ոչ: Դո՞ւք եք որոշում:
Ասատրյան - Խոսքի օրինակ մենք ենք որոշում, որ խոսքի օրինակ, եթե ես կոնկրետ գիտեմ, որ էս անձնավորությունը մի հանցանք է կատարել, գնում ենք վրան:
Գագիկ Ջհանգիրյան - Այդ ի՞նչ զենք էր, վազդուշնի գրանադ, որ եկաք ստուգելու:
Ասատրյան - Էդ ինֆորմացիան գրանցվել ա, պարոն Բաբակեխյանի կողմից համապատասխան ձեւակերպումն արվել է:
Ջհանգիրյան - Այսինքն` զեկուցագիր գրվել է, գրանցվել է՞:
Ասատրյան - Այո, բա ոնց: Գործ չի կազմվել, բայց ինֆորմացիան զեկուցագրով ներկայացվել է:
Հարցուպատասխանի այս հատվածից պարզվեց, որ թեև նշվում է, թե 6-ի «ագենտներից» մեկն է տեղեկացրել Բաբակեխյանին, այնուամենայնիվ իրականում նրան ուղղակի պատվեր է տրված եղել` Ջհանգիրյանին կալանավորելու: Իսկ Բաբախը դատարանում ասում էր, թե Ջհանգիրյանի գործն իր համար շարքային է եղել, նույնիսկ զեկուցագիր չի գրվել: Ավելին, ասաց նաև, որ ինքը որեւէ հրահանգ չի տվել ձերբակալման խմբին, բայց երեկ պարզվեց, որ ստում էր այդ 6-ի պետի տեղակալը: Սակայն շարունակենք ներկայացնել վկայի հարցաքննությունից որոշ դրվագներ:
Սահակյան - Քանի՞ հոգուց էր կազմված ձեր խումբը:
Ասատրյան - 6 էին, 7 էին, 8 էին: Չեմ հիշում, մի տարի անցել է:
Ջհանգիրյան - Իմ հետեւից 8 հոգի էիր ուղարկում, բա ամոթ չէ՞ր, արա:
Ասատրյան - Եթե ես իմանայի, որ դուք էիք ընդեղ, պարոն Ջհանգիրյան... ոչ մեկն էլ չէր գա, ոչ մեկը:
Ջհանգիրյան - Բա որ իմացաք ես էի, ի՞նչ արեցիք:
Դատավոր - Նիստը ես եմ նախագահում, ոչ թե Գագիկ Ջհանգիրյանը: Եթե հարց չեն տալիս, մի պատասխանի:
Սահակյան - Օպերացիայի մասին ի՞նչ տեղեկություն ունեք:
Ասատրյան - Ես չեմ հիշում ում զանգեցի, ասեց դիրքավորվում ենք: Թե ինչքան ժամանակ է անցել, կներեք, ձեռքիս ժամացույց չկար, որ նայեի, պատին էլ կախված ժամացույց չունեմ:
Ջհանգիրյան - Ժամացույցս հանեմ թեւիցս, տամ:
Սահակյան - Դուք հրահանգե՞լ եք զինաթափելուց հետո բերման ենթարկել անձանց:
Ասատրյան - Ոչ:
Սահակյան - Ո՞ւմ մոտ են բերման ենթարկվել:
Ասատրյան - Վարչություն: Անցագիր է կազմվել 3-րդ վարչության անունով, իմ ազգանունով, որովհետև հիմնականում, եթե մարդ են բերում, վարչության պետի ազգանունով ա գրվում անցագիրը: Ըտենց ա: Ընդհանրապես անցագրերը ես եմ լրացնում, հատուկ բան կա, որ հերթապահ մասից տալիս են, հայտագիրը` ևս: Իմանալով ովքեր են, էդ օրն էլ եմ ես լրացրել հայտագիրը, որ մարդիկ են մտել շենք:
Սահակյան - Հայտագիրն ավելի վաղ է կազմվում, այո՞:
Ասատրյան - Հիմա էդ կապ չունի:
Ջհանգիրյան - Շատ կապ ունի, հայտագրերը նախօրոք գրել, իջեցրել էիր:
Ասատրյան - Ոչ, ես չեմ իմացել, թե ում են բերում:
Սահակյան - Ինչքա՞ն ժամանակում կազմեցիք այդ հայտագիրը և քանի հատ:
Ասատրյան - Սիկունդում: Թվով չեմ հիշում, թե քանի հատ: Հիշում եմ Վարդան և Գագիկ Ջհանգիրյանին:
Սահակյան - Գիտեի՞ք, թե Գ. Ջհանգիրյանն ով է:
Ասատրյան - Ո՞նց, ընենց հետաքրքիր հարց եք տալիս: Խի Գագիկ Ջհանգիրյանին ո՞վ չգիտի ով ա: ՀՀ դատախազի տեղակալն էր:
Ջհանգիրյան - Ինձ ողջ Թի՛ֆլիսն է ճանաչում:
Սահակյան - Բա որ գիտեիք` Ջհանգիրյանը դատախազի տեղակալն էր, որ եկան ասեցին, թե պիտի անցագիր իջեցնեք, բերման ենք ենթարկել, չասեցի՞ք` ո՞ր իրավունքով:
Ասատրյան - Ո~ր իրավունքով, հլը մի հատ քաշեի, ծեծեի, թե խի եք բերել: Էս ի՞նչ հարց եք տալիս:
Ջհանգիրյան - Չէ, Ջհանգիրյանին ծեծեիք, եղբորս ծեծեիք: Դուք դատախազության աշխատողին բերման ենթարկելու իրավունք ունե՞ք:
Դատավոր - Ո՞ր իրավունքով էիք բերման ենթարկում դատախազի տեղակալին:
Ասատրյան - Մենք շարժվել ենք «Ոստիկանության մասին» օրենքով:
Փիլոյան - Առարկում եմ հարցը:
Ջհանգիրյան - Հենց օրենքի անունը տալիս ենք, առարկում ե՞ս, Փիլոյան:
Սահակյան - Գլխավոր դատախազի համաձայնությունն ունեի՞ք, որը պահանջում է օրենքը:
Ասատրյան - Ես չգիտեմ: Ես չգիտեմ:
Ջհանգիրյան - Չե՞ս ասել, որ փորձանքի մեջ կընկնենք, Բաբակեխյան, պետք չի, նման բան մի արա:
Ասատրյան - Չէ, չեմ ասել:
Ջհանգիրյան - Հա, արդեն փորձանքի մեջ էիր:
Վերջում նշենք, որ Սամվել Ասատրյանն այն պաշտոնյան է, ում անունով են գրանցված հայտագրերը: Այսինքն, նա է պաշտոնապես բերման ենթարկել Գագիկ Ջհանգիրյանին ու ապօրինաբար պահել 28 ժամ, սակայն երեկ հրաժարվեց` հայտարարելով, թե ինքը որեւէ կապ չունի:
Թագուհի Թովմասյան
ԽՄԲԱԳՐՈՒԹՅԱՆ ԿՈՂՄԻՑ. Նյութի վերահրապարակման սկզբնական տարբերակում շփոթմունք է տեղի ունեցել. ոստիկանության 6-րդ գլխավոր վարչության 3-րդ վարչության պետ Սամվել Ասատրյանի լուսանկարի փոխարեն սխալմամբ տեղադրվել էր Հայաստանի ԶՈՒ Գլխավոր շտաբի տեղեկատվական բաժնի ղեկավար, գնդապետ Սամվել Ասատրյանի լուսանկարը, ինչը համար հայցում ենք պարոն գնդապետի ներողամտությունը։