Առաջին ալիքը հայտնել է, որ ԲՏԱ նախարարության հետ միասին նոր եթերաշրջանում կնախաձեռնեն «Գաղափարից մինչև բիզնես» նոր նախագիծը: Այս առթիվ PR մասնագետ Կարեն Քոչարյանը գրել է.
«Այս հաղորդման գաղափարը տարել եմ ԿԳՄՍ դեռ 2019թ. դեկտեմբերին և հաղորդման սինոփսիսը քննարկել եմ Արայիկ Հարությունյանի և Լուսինե Առաքելյանի հետ: Հետո, ավելի ուշ այն քննարկել ենք Վահագն Թևոսյանի հետ: Հետո ես իմացա, որ հաղորդումն այնուամենայնիվ անում են, բնականաբար առանց ինձ: Խոսեցի Թևոսյան Վահագի հետ, և նա ինձ ասաց, որ առանց ինձ էլ այդ միտքը կար»:
«ՉԻ». Սա լրիվ մեկը մեկին հիշեցնում է ամերիկյան «Գործարար կինը» ֆիլմի սյուժեն: Ֆիլմի հերոսուհիներից մեկը՝ Քեթրին Պարկերը, գողանում է մեկ այլ հերոսուհու՝ Տես Մակգիլի բիզնես-նախագիծը և ներկայացնում որպես սեփական մտքի արգասիք: Ապացուցել խարդախությունը գործնականում անհնար էր, բայց այնուամենայնիվ սուտը բացահայտվում է, երբ Քեթրին Պարկերը չի կարողանում պատասխանել մի պարզ հարցի. ինչպե՞ս է նրա մոտ ծագել այդ բիզնես-նախագծի գաղափարը: Մինչդեռ Տես Մակգիլը հանգիստ ներկայացնում է բիզնես-նախագծի մտահղացման նախապատմությունը:
Նույնն էլ այս դեպքում է. Կարեն Քոչարյանը բացատրում է, թե նոր նախագիծը, որը պետք է հեռարձակվի Առաջին ալիքով, դրա գաղափարը իր մոտ երբ է առաջացել, ինչ հանգամանքներում, որը որից հետո է եղել, ում հետ է հանդիպել, ում է հայտնել գաղափարի մասին:
Եվ հիմա այդ հարցը պետք է տալ Առաջին ալիքին և ԲՏԱ նախարարությանը. իսկ ձեր մոտ ինչպե՞ս է առաջացել նախագծի գաղափարը: Ե՞րբ, ի՞նչ հանգամանքներում, ո՞ւմ շնորհիվ: Մենակ չասեն, թե գաղափարը գիշերը երազում է եկել, ինչպես քիմիական պարբերական աղյուսակը Մենդելեևի երազում:
Ապացուցել, որ Առաջին ալիքն ու ԲՏԱ նախարարությունը գողացել են մասնագետի գաղափարը, շատ բարդ է: Բայց քանի որ Կարեն Քոչարյանը այս տարիների ընթացքում բազմաթիվ նախագծեր, գաղափարներ է կյանքի կոչել, հանրությունը նրան ճանաչում է, չենք կարծում, որ այս դեպքում կեղծավորություն է ցուցաբերում կամ անիմաստ աղմուկ է բարձրացնում:
Սա մի ուրիշ բան էլ է ցույց տալիս. թե ինչքան խղճուկ վիճակում են մեր պետական համապատասխան կառույցները, որ ի վիճակի չեն սեփական ուժերով մեն մի հատիկ գաղափար, նախագիծ երկնել ու ստիպված են դիմել մանր ժուլիկությունների: Ու դա էլ դեռ հարց է, կկարողանա՞ն այդ նախագիծը նորմալ աշխատեցնեն: