«Ազգային անվտանգություն» կուսակցության նախագահ Գառնիկ Իսագուլյանն այսօր ասուլիսում հայտարարել է.
«Արցախի նախագահները՝ Ռոբերտ Քոչարյան, Արկադի Ղուկասյան, Բակո Սահակյան, ամբողջ գեներալիտետը, Արցախի ազգային հերոսները ոչ միայն պետք է այդ հարցը բարձրացնեին, այլև պետք է Նիկոլին սատկացրած լինեին, որովհետև այդ մարդը ծախել է իրենց հայրենիքը, իմ հայրենիքը, մեր հայրենիքը: Իրենց լռությունն ինձ համար անհասկանալի է, կամ մեկ-մեկ հարցազրույցներ տալը: Այդ մարդիկ պարտավոր են ամենաակտիվ մասնակցությունն ունենալ էս դավաճանին օր առաջ իշխանությունից քշելու և հետո դատելու գործում: Վերջում էլ Սահմանադրության մեջ փոփոխություն կատարել, որ պատերազմի ժամանակ դավաճանները պետք է գնդակահարվեն, հետո էլ գնդակահարեն պատի տակ»:
«ՉԻ». Նորմալ է: Ժողովրդավարական երկիր ենք, ով ինչ ուզում, ասում է: Սատկացնել, գնդակահարել, պատերի տակ կախել: Մեկ է, հիմա նման կոչերի համար մեր անկախ ու արդար դատարանը ոչ մեկին չի դատում:
Բայց մեզ ուրիշ բան է հետաքրքրում. Արցախի նախկին ղեկավարներին կոչ է անում վերացնել Նիկոլ Փաշինյանին, քանի որ վերջինս ծախել է նրանց հայրենիքը: Մի կողմ դնենք այն փաստը, որ Գառնիկ Իսագուլյանը Քոչարյանի, Ղուկասյանի, Բակո Սահակյանի հայրենիքը Արցախն է համարում:
Հետաքրքիր է, Գառնիկ Իսագուլյանը ինչո՞ւ նրանց կոչ չի անում կորցրած տարածքները ետ գրավել: 20 տարի ասում էիք, թե Արցախի նախկին ղեկավարները Լևոնից թաքուն էին տարածքներ գրավում, Շուշին ազատագրում: Բա կոչ արեք, թող գնան, հիմա էլ նույնը անեն: Հաստատ Նիկոլ Փաշինյանը չի կարող նրանց խոչընդոտել: