Երեքշաբթի 18.05.2021 08:43

31.05.2020   19:00
1468

Գյուղացու անվան տակ բանկերին հարստացնում են


«ՉԻ» զրուցակիցն է «Ագրարագյուղացիական միավորում» ՀԿ նախագահ Հրաչ Բերբերյանը

- Պարոն Բերբերյան, կորոնավիրուսի տնտեսական հետևանքների չեզոքացման ծրագրով զրո տոկոսով վարկեր է տրամադրվում ֆերմերներին` արտոնյալ մարման ժամկետով: Արդյոք այս ծրագիրը կանաչ լույս կվառի՞ գյուղատնտեսությամբ զբաղվողների առաջ:

- Կառավարությունը պետք է վարկավորման ծրագիրը քննարկեր ոչ թե մարտ-ապրիլ ամիսներին, այլ՝ հունվարին, որովհետև Հայաստանում գյուղատնտեսական աշխատանքներն սկսվում են մարտի սկզբից: Գյուղացին այդ ժամանակ պետք է գումար ունենա սերմացու, դիզվառելիք, պարարտանյութ ձեռք բերելու համար: Արարատյան դաշտում բնակիչների համար այդ վարկերը 2-3 ամիս ուշացումով են, իսկ մյուս մարզերի համար՝ մեկ: Երկրորդ՝ բանկերն առաջվա պես պահանջում են փաստաթղթեր, երաշխիքներ, հետո գրավների արժեքներն իջեցնում են՝ դարձնելով կոպեկներ: Ստեղծում են քաշքշուկներ, ամեն ինչ անում են, որ գյուղացին վարկ չստանա: Ինչի հետևանքով ունենք բանկերում հերթեր: Այդ վարկերի համար դիմողներից մոտ 20 տոկոսն է ստացել: Մնացածները հերթագրված սպասում են: Բազմիցս կառավարությանն ասել ենք, որ գյուղացու անվան տակ բանկերին հարստացնում եք: Վիզ դրած հարստացնում են բանկերին՝ փոխանակ այդ վարկերը, սուբսիդիաները տրամադրեին գյուղացուն՝ մեկ հեկտարի հաշվարկով:

- ԱԺ գյուղատնտեսության և բնապահպանության հարցերի մշտական հանձնաժողովի նախագահ Վարազդատ Կարապետյանը գարնանացանին ընդառաջ գյուղացիներին կոչ արեց այս տարի ոչ մի թիզ հող անմշակ չթողնել, խնդիր ունենալու դեպքում դիմել իրենց: Ի՞նչ եք կարծում, հայտարարությունը չպե՞տք է ուղեկցվեր կոնկրետ առաջարկով՝ ինչպես Վրաստանն արեց ոռոգման ջուրն անվճար դարձնելով:

- Ով է դա (նկատի ունի Վարազդատ Կարապետյանին): Ինչ կապ ունի Վարազդատ Կարապետյանը գյուղատնտեսության հետ: Իրենք ինչ քայլեր են արել, որ գյուղացին ժամանակին վարկերը ստանա: Բացի խանգարելը ուրիշ բան չեն արել: Ամեն ինչ արել են, որ գյուղացիական կազմակերպությունները դրսից սերմացու չստանան: Օրենք են ընդունել, որ դրանով միայն առևտրային կազմակերպությունները կարող են զբաղվել: Այսօր մաքսայինը ստիպում է ֆերմերային կազմակերպություններին դառնալ առևտրային կազմակերպություն, նոր միայն կարող են մաքսազերծում անել: Այդ մարդիկ դեռ իրավունք ունե՞ն գյուղացու անունից խոսել: Մենք այս հարցով դատարան ենք դիմելու, փաստաթղթերն արդեն պատրաստման փուլում են: Այդ օրենքը գաղտնի են ընդունել, քննարկման չի դրվել և անօրինական է: Ընդունված օրենքի համաձայն՝ գյուղացիական հասարակական կազմակերպությունները, եթե ուզում են դրսից սերմացու բերել, չեն կարող մաքսազերծել: Պետք է վերափոխվեն, դառնան առևտրային կազմակերպություն: Տարբերություն են փորձում մտցնել, որ մի կազմակերպությունը կարող է ապրանք բերել, մյուսը՝ ոչ: Չեմ հասկանում այդպես են արել, որ իրենց կազմակերպություններն աշխատե՞ն:

- Ոռոգման ջրի հարցը գյուղատնտեսության ամենամեծ խնդիրներից մեկն է: Նիկոլ Փաշինյանը Արարատի մարզ կատարած այցի ժամանակ նշեց, որ եղած ոռոգման ջրով կարելի է ավելի շատ հող մշակել: Ի՞նչ եք կարծում, խնդիրը ջո՞ւրն է, թե՞ աշխատանքի ճիշտ կազմակերպումը:

- Տեսականորեն վարչապետը ճիշտ է: Գործնականում այդպես չի կարող լինել, որովհետև այսպես թե այնպես ամեն մշակաբույս իր ոռոգման ջրի պահանջն ունի: Ցավոք սրտի, դրա մասին վարչապետին չեն ասում, որ, օրինակ, կարտոֆիլին 3-4 անգամ ջուր պետք է տալ, լոլիկին 7 անգամ է ջուր անհրաժեշտ: Ջրային կոմիտեն արհեստականորեն ուռճացրել է նորմատիվները, որևէ մեկի հետ չի համաձայնեցրել: Ավելի շատ գումարներ են հավաքել, քան թե դրա դիմաց գյուղացին ջուր է ստացել: Վարչապետը, երբ եկավ իշխանության, շատ լավ հայտարարություն արեց, որ բարեփոխումներ են պետք: Սկսեց ջրային կոմիտեից: Ջրային կոմիտեում 5-6 տնօրեն փոխվեց, բայց մեկը մեկից անգրագետ: Դա բարեփոխո՞ւմ է կոչվում: Բարեփոխումը մրցունակությունն է, որ պետք է մտցնեին ոռոգման ջրի շուկայում, ինչը չեն կատարում և հիմա մոնոպոլ ենք:

- Փաշինյանն, ամփոփելով մարզ կատարած այցը, նշել էր, որ գյուղատնտեսության ոլորտում մեկ խնդիր ունենք՝ գիտելիք և այսօր պետք է այս ոլորտում մտածողություն փոխել: Իսկապե՞ս ֆերմերն իր գործը չգիտի:

- Ճիշտ է ասում պարոն վարչապետը: Պետք է գիտելիքներ ունենան, բայց առաջին հերթին կառավարությունում: Ցավոք, այն մասնագետները, որոնք կառավարությունում իր կողքը կանգնած են, ինձ մոտ անգամ ցրիչ չեն աշխատի: Մի հատ թող կառավարությունը տեսքի բերի, հետո գյուղացու մասին կխոսենք: Մենք Հանրային հեռուստատեսությամբ ունեինք «Ագրոժամ» ծրագիրը, բայց այսօր գյուղացին Հ1 չի նայում: Այդ հաղորդումը կարող էին օգտագործել և գյուղացուն խորհուրդներ տալ: Ունենք գյուղատնտեսության աջակցության մարզային կենտրոններ, մարզպետարանի գյուղատնտեսության վարչություններ, որոնք պետք է խորհրդատվություն տան, բայց չեն անում: Մտածողության փոփոխությունն առաջինը պետք է կառավարությունից սկսել:

- Վարչապետն ասաց, որ գյուղացին մինչև այն պայմաններում չաշխատի, որ կոկիկ հագնվի ու գնա իր այգին մշակելու, բարեկեցիկ կյանք չի ունենալու: Այս արտահայտությունը շատ քննադատվեց: Դուք ի՞նչ կարծիք ունեք:

- Սմոքինգ էլ կհագնի, եթե պետական ապարատը լավ աշխատի:

- Այս ոլորտում ի՞նչ քայլեր պետք է անել, որ հեղափոխություն լինի:

- Բարեփոխումների պետք է գնալ: Ոռոգման համակարգը մոնոպոլ է, պետք է կոտրել: Պետք է հասկանանք, թե մեր երկիրն ուր ենք տանում: Մենք կառավարություն ենք ներկայացրել հացազգիների ցանքատարածությունների ավելացման մեթոդաբանությունը: 120 000 հեկտար ցորենի ցանքատարածությունից դարձել ենք 60 000: 3-4 տարում կվերականգնենք ցանքատարածությունները: Առաջարկ ենք ներկայացրել: Գարու մշակության ավելացման ծրագիր էլ ենք արել: Կօգնի կառավարությունը, մենք կանենք: Մեր կազմակերպությունն ասել է՝ անտոկոս վարկ տվեք, մենք մեր ասածները կկատարենք: Ամենակարևորը գիտելիք է պետք՝ տգետների հետ երկիր չեն կառուցում:

- Անդրադառնանք այս տարվա սպասվող բերքատվության ցուցանիշներին: Ծիրանն առատ կլինի՞:

- Սպասվում է միջին բերք: Տևական անձրևներն առաջացրին սնկային հիվանդություններ: Լավ փոշոտում չեղավ, որն էլ ազդեց բերքատվության ցուցանիշի վրա:

- Անցյալ տարի գյուղատնտեսության ոլորտում անկում գրանցվեց: Նախնական տվյալներով, այս տարի ի՞նչ պատկեր կունենանք:

- Անցյալ տարվանից մի փոքր էլ վատ վիճակ կլինի: Անկում էլի կունենանք:

- Պատճառը ո՞րն է:

- Ծիրանի բերքն անցյալ տարվա համեմատ քիչ կլինի: Դեղձն էլ քիչ կլինի: Այդպես էլ մորմազգիների ցեցի դեմ չպայքարեցին, լոլիկի բերքը մի քիչ կպակասի: Էլի ամբողջ ամառ կուտենք ջերմոցի լոլիկ, բաց դաշտի լոլիկ չենք ունենա: Եթե գազի գինն էլ բարձրացավ, ջերմոցային տնտեսությունները կխեղճանան: Տավարի մսի գինն արդեն 4000 դրամ է դարձել, որովհետև արոտ են բարձրացել: Անցյալ տարվա համեմատ մոտ 500 դրամով միսը թանկացել է: Այս տարի անասնակերի պակասի պատճառով գյուղացին մինչև գարուն անասուններին դանակի տակ դրեց:

Մանյա Պողոսյան

«Չորրորդ իշխանություն», թիվ 26, 2020



 Պիտակներ

         Մանյա Պողոսյան, «Չորրորդ իշխանություն», գյուղատնտեսություն, Հրաչ Բերբերյան

››› Չարենց. Դաշնակցականներին (Ներբող քաղաքական)
››› Սա քո պատերազմն էր, Նիկո՛լ
››› Ոչ ոք չի թաքցրել տարածքներ զիջելու փաստը
››› Քայլ արեք, իրար կերեք
››› Արմեն Շեկոյան. Միջնորդը
››› «Չորրորդ իշխանություն» թերթի և 4rd.am կայքի ՀԱՅՏԱՐԱՐՈՒԹՅՈՒՆԸ
››› Ո՞ւմ ձեռնտու չէ 200 միլիոն դոլարի ներդրումը
››› Երևանի ժառանգության պաշտպանության կոմիտեի հայտարարությունը
››› Իշխելու թշվառությունն ու փառքի արվեստը
››› Անասնաֆերմա՝ Նարեկ Սարգսյանից Նիկոլ Փաշինյանին... Տիգրան Ավինյանին էլ
››› Մերժվածների ջղակծկումների և վարչապետի ձախողումների արանքում
››› Ո՞վ է եղել իրական դավաճանը
››› Երբ թիրախավորվում է լռությունը
››› Ինչո՞ւ են զինվորները զոհվում Ղարաբաղում և ինչո՞ւ են բոլոր զոհերը հայաստանցի
››› Մշակութային հեղափոխություն չի լինելու
››› Ատելության խոսքը, ամբոխահաճությունը և տրամաբանությունը
››› Տաշիրյան սարդոստայն
››› Գործող Սահմանադրությունը կարող է ոչնչացնել հեղափոխությունը
››› Առաջիկա երկու-երեք ամիսները վճռորոշ են լինելու
››› ԱԱԾ-ն պետք է կանխի Քոչարյանի գայթակղությունները
››› Նիկոլն ընդդեմ Նիկոլի
››› Այսպես է լինում, երբ վեթթինգի փոխարեն հավատում են դատախազի ազնիվ խոսքին
››› Սրանց գործը փախնողներին «հաջող» անելն է
››› Արսեն Թորոսյանն ու Ալեն Սիմոնյանը՝ 1-9 հաշվով պարտության գլխավոր մեղավորներ
››› Ակորդեոնիստը որոշել է նստել «սուխոյ ատկազով»
››› ՀՀԿ-ի անհաջող գրագողությունը
››› Տանը վեր ընկնելու ժամանակները
››› Անցյալի պատանդները

Ամենաընթերցված


























Գործակալ 00
Գործակալ 00
01.01.2020 / 18598


Խոսող ձուկը
Խոսող ձուկը
10.11.2019 / 18213




Պեսիմիստական
Պեսիմիստական
08.03.2020 / 17144



Բոլոլա շաբաթ
Բոլոլա շաբաթ
28.09.2019 / 16757



Բա
Բա
20.11.2020 / 15689




Գործակալ 00
Գործակալ 00
01.01.2020 / 15141




Գործակալ 00
Գործակալ 00
01.01.2020 / 14166

The Tashir spider web
The Tashir spider web
09.12.2019 / 13912